Tsunamis Nih Japan a Den

Kum 100 chung an ram tuanbia ah a fakbik mi Tsunamis lihninh, 8.9-magnitude a thawngmi nih Japan  ram cu ningani anmah lei nazi 14: 30 hrawng ah  fak tuk in a den i, tutiang theih khawh tawk ah minung 300 leng an thi cang ti asi. Mi tampi hma an pu lai ti zumh asi caah thinphang dailo in an um lio asi ko. Lihninh nih tilet a thawhtermi  nih rili kam le khuachung tiang in ti nih a hun phanh dih, meter 10 leng a sang (Pe 30 leng) mi ti vaam pang a si caah thil tamtuk  a hrawh, zeizat man dah thil a hrawh timi a chuak rih lo nain billion tampi tam asi kho tiah tuak cia asi cang.

Tutan tsunamis ai thawknak  cu Japan khuapi Tokyo in 373 km ai hlahnak ah asi i, ramdang dang zong a den khawh ve hna tia ruah asi caah ram 50 bak warning an rak pek cio hna. US  zong ah Japan a den khawh hnu nazi 8 nak tlawmdeuh ah a va phan ve i thil umtuning  hmanthlak a tla cuahmah mi minung pakhat a nunnak a va laak ve.

Hi tluk thawng lihninh hi 2004 ah ai hninmi Indonesia le Asia ram cheukhat faktuk in an rak kan deeng tu Tsunami thazaang he ai tluk ti asi. Kum 2004 tsunamis nih cun minung 200, 000 nak tam a rak thah hna. Khuaruahhar pakhat asimi cu, lihninh ruangah Japan a ram ning in pa 8 hrawng vawleicung i a umnak hmun ai thial ti asi. Cucu GPS system (vancung satelike) in an zoh hnu ah scientist pawl nih an khawnfam mi asi. Tsunamis timi a sullam cu, vawlei hninh cheu ruangah riliti let a thomi kha asi i, hi bantuk fak piin nizan bantuk a chuah tik ah tlang le tikulh tibantuk hna an i thial tawn.

Ram sifak deuh asimi Africa le Asia hna ah tu bantuk a tthawngmi tilek-lihninh nih kan cheih than seh law, minung thong tampi kan thi rih kho men ko. Japan cu ram rum an si pinah, lihninh a tong lengmang cangmi ram zong an si caah, inn an sakmi hna hi lihnih tuar kho ding in ttha tein engineer an tuahmi an si. A vawlei hram kaupi in tthial mi inn pawl ti dah lo cun, lihninh sawhsawh ruangah inn an rawk  kho lem lo. Ti nih a rak phanh khawhmi mawtaw le boat  a thawng in a hrawh hna mi video zoh len khawh asi.

Harnak tuarmi hna caah bawmhnak ding caah UN zong nih a rannak in a hun tawlrel colh, US zong nih bawmhnak a kuat colh ve. Theih bantuk in Japan cu a rum ve bantuk in ramdang cung ah minung caah bawmhnak a tuahmi hi a tam ngaingai tawn. Cucaah, UN secretary Ban Ki-moon nih cun, mi haarsa tampi a rak bawmmi ram pakhat nih harsatnak a ton tik ah kan zoh kho hrim lai lo, nan rak bawmh cio ko lai ti ruahchannak kan ngei  ati.

[wppa type=”album” album=”4″ size=”500″][/wppa]

Scroll to Top