Aung San Suu Kyi an Chuah Cang!

Pi Suu Kyi an hrennak inn in a chuah bak, a riantuanpihawi cheukhat hna nih an rak hruai i, adongtu mipi hna a rak chawn ta hna lio. Kum 65 asi cang i, tutan cu a hun upa deuh ngaingai cang ti a mui in a lang.

Aluan cia kum 21 chungah kum 15 leng inn thawngchung ah an rak hrenmi, kum 65 asi cangmi le Burma caah Nelson Mandela titiang in vawleicung mipi nih theihmi le upatmi, vawleicung theih in minthatnak laksawng tampi a hmuh pin ah daihnak laksawng vialte lak ah a sangbikmi Nobel daihnak laksawng zong 1991 ah a rak hmumi, Burma ram minung hna caah kan pi raltha Aung San Suu Kyi cu nihin Norway caan nazi 12:00 ah an chauh cang.

Tu an chuah hi, a thawng tlak nithla a tlin cang caah asi pin ah, vawleicung hruaitu hna nih chuah cang ko uh tiah fak piin an au lengmangnak awan an sullam a ngeihnak zong asi tiah chim khawh asi. Cun mitampi nih zumhbikmi cu, Ralkap cozah nih tha tein election an tuahkhawh cang i, anmah nih parliament ah hmunhma kan tei cang ti fiang tein an thanh cang caah, Suu Kyi a chuah zongah hnahnawhnak an kan pe kho ti lailo tiah an ruah ca zongah asi lai ti ruah asi.

Suu Kyi a chuakcang lai ti ruangah Rangoon aumnak inn leng in minung a thawng nih nizan nihngani te khan an rak hngak cang, ramdang ramchung media pawl zong 200 nak tam an I tel te asi. Tuzanlei a chuah cangka in a chimmi cu, ” nan za tein kan i tongthan hna i kai lawmtuk hringhran, thaizing chun nazi 12:00 ah kan NLD zung ah biaruahnak tonnak kan ngei te hna lai, rak ra kho cio te uh” tiah a chim ti asi. Thaizing cu minung thawng tampi an chuak te lai i, ralkap pawl an thin an I dawmh lai tiah Irrawaddy editor Aung Zaw nih CNN interview ah a chim. Suu Kyi lawyer interview an tuah ve i, a chimmi cu, hi a chuah ruangah ruahchannak ngantuk ngeih ngam ding asi rih lo, zeibantuk hnatlaknak he dah a chuah ti zong theih asi rih lo I, caan tlampal cu hngah deuh ah a tha ko rih “ ati ve.

Thong an chuah hlan in, a chuak taktak suallai lo ti a phangtuk mi hna an rak tampi, cu hna pawl caah cun, nihin thawng kan theih cu thaw a chuak deuh hrim ko. Bochanmi, cung zoh in kan i zohmi minung hna nih zeihmanh tuah kho lo in an hreen ko hna ah cun, mi tha a chia, lung hna a ong tawn lo. Pi Suu nih zeihmanh cu a tuah rih lo- zei a tuah khawh lai ti hmanh theih asi rih lo nain, luatnak a hmuhcang ti thawngpang kan theih vial hmanh ah, thazaang a tlung deuh i, ruahchannak an hun chuak than tiah ti khawh asi.

Political party upa cheukhat le tlangcungmi upa hna zong nih Pi Suu cu ton kan duh ko tiah an hun ti len cio.  Vawleicung hruaitu upa pawl zong nih Suu Kyi a chuah cu thawngtha pakhat asi, nain ara laimi caan ah athami thawngpang ai peh khawhnak kha abiapi tiah an rak ti cio. US president Obama nih ” keimah caah mi raltha- HERO” tiah Suu Kyi cu a conglawmh. Burma kong thei deuhmi a cheu nih an ruahnak ah cun, Suu Kyi cu election ah i tel hmanhhhlah seh law, ram sernak ah biapituk dirhmun a ngei pengmi asi caah, ram sernak ah amah pumpak ai tel lo ngaingai ah cun, Burma mipi an lung a tling lai lo i ningcang ngai in hruai khawh mi ram pakhat ser ding ah asi kho lai lo ti hi an chim tawnmi asi.

Tu bantuk in Ralkap nih an thlahmi kong ah ruahnak phunphun aum, bianaah, Ralkap nih aluanciami ni nga, Nov 7 ah an tuahmi election kongah vo firnak, ralkap nih atanhtuhna party lei in a diklomi cawlcanghnak/riantuannak a um ti asi ruangah, vawleicung ram cheukhat, abikin nitlaklei ram hna nih thangchiatnak  an tuah len cang. A result a chuak cang nain, ahohmanh nih Ralkap nih an thanhning in 80% leng nih Ralkap caah vo an thlak ti hi zumh asi lo. Hi vawleicung mipi zumhnaknak lungfahnak kha, Pi Suu kan chuah thawngin zeital a zawr deuh hnga maw ti hi Ralkap nih an ruahmi asi ko ti hi zumh asi fawn rih.  Ralkap nih vawleicung sin ah an hei ti duhmi cu ” Suu Kyi zong thawngthlaknak term upadi ning tein kan chuah cang hih, cucaah kannih kan i timhmi cu ramchung ah democracy le zalonnak aum khawhnak hi asi ko ” ti kha asi. Nai ah khan thawngpang nih an tialmi aum rihmi cu Pi Suu a fapa zong anu tong kho ding in Burma cozah nih VISA an pek ti  asi.

Hi hnu a chuak khomi zumhmi: Mipi cawlcanghnak a chuah sual i, democracy aunak maw, mibuu duhnak langhternak maw a um than asi ah cun, 2008 sermi upadi ning in Ralkap nih control nak nawl uknak tingnak nawl an ngeih bantuk in an thlaih than lai. Silole, Pi Suu nih direct in cozah akaimi kha challenge tuah loin, biaruahnak tu kan ngei hna lai, zeitindah ram caah rian kan tuanti khawh hna lai ti phun in tangdawr tein bia a chim ah cun, biaruahnak achuak kho ti zumh aum. Nihin Pi Suu nih a chimmi bia a sullam a ngei ngai kho mi pakhat aummi cu, “Thil cu chim caan aum i, chim lo caan aum” ati. Ati duhmi hi, tutan cu, hlanlio bantuk in biachim ding asi tilo ati duhnak maw, siloah dai tein ka um rih ko lai ati duhnak, silodah a dang a duhnak aum hnga maw? ti hi ruah awk aum.

Scroll to Top