(Atanglei biaruahnak hi CND 2017/2018 Committee, Rogaland, Information Committee member pakhat asimi Vaal Mang Bawi Lian nih 2016 Norway Lai Paih Champion Vaal Ngun Ling Thang (NLT) he biaruahnak a tuahmi asi)  Ngun Lian Thang

Na min le na kum, na nu le na pa min, Laitlang na khua le atu na umnak?

NLT: Ka min cu Ngun Ling Thang a si i, kum (23) ka si. Ka pa min Hram Hnin, ka nu min Cer Zi a si. Laitlang ka khua cu Hniarlawn a si. Atu ka umnak cu Norway, Egersund khua ah a si.

Na khaan (Height) le na rihzaan (weight) ?

NLT ; Ka khaan hi 5`4“(cm165) a si. Ka rihzaan hi pound 144 (65 kg) a si.

A tu sianginn na kai liomi le hmailei na saduhthah ?

NLT ; Atu ka kai lio mi hi innsak (Bygg og anlegg teknikk) a si i, kum hnihnak ka kai lio a si. Hmailei ah rianttha hmuh ding hi ka saduhthah a si.

2016 Paih Champion na rak si. Pazat dah na rak tei hna? Na paih mi hna chung ah tah hodah naa harh bik?

NLT ; 2016 lio ah hin minung pahnih ka rak tei hna i bual ka rak co. Mah kaa paih lio hi sau zong kan rak i pai manh lo, minung zong an tlawm caah. Cun kaa rak harh lem hna lo, ka tha zong a ba manh lo.

Paih hi zeitik in dah naa rak thawk, na cawng bal maw? Cun 2018 tah?

NLT ; Kum 7 hrawng ka si lio hin ka hawile he kan rak i pai tawn. Paih bual chung ka chuah hmasa bik cu kum 12 hrawng ka si ah a rak si. Paih cawn hi saya ngeih in cawn ti bantuk in cun ka cawng bal lo. Ka hawile he kan rak i paih bikmi hi a si ko. CND 2018 zong ka dam ahcun ka pai ko lai.

Mi teinak ah zei kuat dah na thiam bik cem? Vangkhen, sumpom, thachung hngerh, khelcungchuan tibantuk .

NLT ; Ka hmanmi aa thleng tawn i hlan ahcun thachung ngerh hi ka rak hman bik. A tu cu vangkhen deuh hi ka hman bik cang.

Gym hi zarh khat ah buaktlak in voi zat dah na kal khawh?

NLT ; Zarh khat ah voi 2-3 hrawng deuh hi ka kal tawn.

Gym na kal ah ei na hrial mi le a hlei in na tuah mi a um maw?

NLT ; Ei ka hrialmi hi a um lo, a hlei in ka tuahmi zong a um lem lo.

Ngun Lian Thang trainingPaih hi mi tampi nih cun hruh bantuk ah ruah a si, a lunglut lomi (interest) kan tampi tawn. Mah hihi nang zeitindah na hmuh?

NLT ; Kan Lai paih cu zaanglek (nasjonal sport) pakhat a si i kan kal pi ding a si ko tiah ka ruah. Kan Lai nunphung pakhat zong a si fawn. A lunglut lo mi pawl hi cu khawnden an ttih ca zongah si kho men. Kan Lai paih hi zulhphung tha tein an zulh ahcun khawnden hi a um tuk lem lo. Tahchunhnak ah an kut te hna an i namh lo ahcun, bawlung chuih te hna nak hmanh khin i khawnden hi a tlawm deuh lai tiah ka ruah.

CND 2016 ah Champion na rak si. CND 2017 ah ah Tha Hlei Cung he nan rak i tong i na rak sung. Zeiruang bik ah dah a si rua tiah na ruah? Na sungh lio le Champion na si lio na lungthin cawlcangh ning?

NLT ; Si mah kha cu keimah nak in a tthawn deuh ruangah a si ko. Ka sungh lio ah ka ruahmi cu hmaikum ah Champion ka si lai ti hi a si bik ko. Champion ka si lio ah cun ka nuam i hmailei ah Champion lak duhnak lungthin ka ngei tthan.

Lai paih thiam lak ah na uar bikmi pakhat. A ruang ?

NLT ; Lai paih thiam lak ah ka uar bikmi cu Chan Ceu Hlei Thang (Hniarlawn) hi a si. A nih hi kehlei vangkhen a hmang mi a si i, mi a tengh dan hna a dawh tuk hlei ah rel tla tein a tengh khawh zungzal hna.

Tukum CND 2018 hi taisawm tuah hmasa bik kum a si caah ho nih dah tuanbia thar a ttial te lai ti hi lungtor cio a si. Tukum CND 2018 Champion ka si lai tiah i zumhnak (Confidence) le timhtuahnak zei tluk dah na ngeih?

NLT ; Si timhtuahnak zong tha tein ka ngeih ko caah keimah nih ka lak ko lai tiah kaa zumh ko.

Hmailei ah Europe Paih Champion ka si kho te lai tiah na ruat maw?

NLT ; Ka ruah ko ka si te hrimhrim lai tiah zumhnak ka ngei.

Norway Lai paih hmailei ah a tthancho khawhnak hnga na saduhthah?

NLT ; Norway ah paih kan tuah hi CND ni lawng ah a si caah hin tthancho ding hi a har rih. Mah cahcun zuamnak (tournament) phun in voikhat tal hi i chap seh ti hi ka duh ngai. Norway Lai mino zong kan lungtho deuh lai i, paih zong kan huam deuh lai. Cun kan tthangcho ko lai tiah ka ruah.

World Champion (USA) tiang kan phan kho te lai tiah na ruat maw?

NLT ; World Champion tiang hi kan phan kho te ko lai tiah ka zumh. A ruang cu Norway Laipa pawl hi kan tthawng ngai hna i a ngan zong kan ngan ngai cang ko hna. Training tha tein kan ngeih khawh ahcun World Champion tiang kan phan hrimhrim lai tiah zumhnak ka ngei.

Teinak caah zeidah a herh bik cem tiah na ruah mi pakhat in?

NLT ; Teinak ahcun thiamnak (Teknik) hman khawh hi a biapi bik ko tiah ka ruah.

Nungak pawl siaherh na lawng maw tu hi?

NLT ; Hihi cu pumpak (personal) kong ah i chiah usih J

Thazaang an petu (Fans) pawl sin lunglawmhnak le biacah?

Thazaang a ka pe tu nan dih lak cungah kaa lawm. Lungdong lo tein hmailei zong ah tha ra ka pe chin lengmang ko u. Kan naule pawl sin ah biacah ka duh mi hna cu paih hi kan nunphung (culture) a si caah hmailei ah kan thlau lonak hnga zulh le paih duhnak lungthin rak ngei cio u ti hi cah kaan duh mi hna a si.

Biaruahnak caan na kan pek caah kan i lawm. Good Luck !!

NLT ; Kei zong kaa lawm ve.

CND 2017/2018 Committee, Rogaland

Information Committee

 

 

Photo credit: Tha Hlei Cung Na min le na kum, na
CCN nih kan in remh piak lai. Na mawtaw EU Godkjent na tuah i an
Norway ah Chinmi tampi umnak Rogaland ah Chinmi upa 31 tluk telin 'ton biaruahnak' cu
  Norway Chin Christian Youth Federation tawlrelnak in 2017 Summer chungah concerts hmun 4 ah

Leave a Reply

Your email address will not be published. Required fields are marked *