Salai Kipp Kho Lian nih Froland i tuahmi CND ah bia a chim lio. Foto: sibmlian

February 20, cu Chinmiphun nih kan sunhsak tukmi “ni” a si. Kan Miphun Ni a si. Ramkip i kan umnak cio ah hi ni philh lonak tiin kan tuah hna. Norway i Froland khua zong ah Telemark Fylke le Aust Agder Fylke i a ummi Chinmi hmunkhat teah February 18, ah khan kan rak hmang kho.

Salai Kipp Kho Lian, Germany i democracy cawlcanghnak siseh kan miphun ramrian kong ah bochanmi nih a kan telpi i bia zong a chim. “Kan miphun ni hi peng khat le peng khat i dannak si loin lungrual tein miphun khat sinak kha biapi ah chia in kan hman ding ah forhfial kan duh ko hna.” tiah a chim. A biachimmi tlingte in Hikahin MP3 in a aw ngaih khawh a si.

Chinmiphun Ni paoh ah hi ni a thawhkehnak le Falam tonpumhnak kha chim chih a si lengmang. Mirang uknak in luatnak kan hmuh hnu ah kan ram ah Zauk Phung (democracy) in i uk cang ding in an rak khaan i cu hlan i Bawi phun le ramuk bawi uknak cu an rak hrawh. Sal a ngeimi hna zong nih Abraham Lincoln nih minak pawl sal sinak in luatnak a pek hna bang an rak pek hna. Cu ruang te ah cun hi “Ni” hi a sunlawi khunnak le a biapit tuk ning cu a si.

Sihmanhsehlaw, nihin i Chinmiphun hna nih kan Miphun Ni kan hman ning cu nunphung hmuhsaknak (Culture day) bantuk in kan hman cang. Cu tikah Falam i an rak khaan mi Bawiphun le Chia, Sal ti um lo in miphun khat sinak ah aa rualmi kan rak sinak a muru hi kan thlau cuahmah. Halkha khuapi hna ah cun Khuang hna an cawi i Bawi phun sinak le kan nunphung kha an langhter. Kan miphun ni ah ahohmanh idannak um lo in nuam le lawm taktak in um ding mi cu a nemnak in thleidannak, i khah lonak, cun pengtlang i dannak hmuhsaknak bantuk ah a hong tla.

Kan nunphung ni a si lo. Chinmi vialte miphun pakhat kan sinak le hohmanh a niam, a sang, bawi phun, chia phun, sal ti um lo in kan ram ah rorel tti khawhnak lam a hong um ni a si. Cucaah peng khat le peng khat a dang tein hmang lo in kan miphun ni cu hmun khat te ah hman tti khawh peng hi a biapi tukmi a si.

Norway i Chinmiphun tlawmte zong nih Chin tiin le Zomi National Day tiin a tuahmi kan rak um tawn. Cu bantuk in Kan ram lila siseh ramkip zong ah a rak um. Chin, Lai, Cho le Zo tibantuk nih a kan huap dih ti ah  kan cohlan khawh  a si ahcun a ttha nain mah ni ahhin miphun tling lo in a dang tein a hmangmi kan rak ummi hi kan miphun ni a muru cu a rak si lo. Zo, Lai, Chin, Cho tiin kan hman zong ah kan miphun ning in kan tlin ding kha a muru cu a si.

Chinmiphun Ni hmandan kan duhning hmanh aa khah lo caan a um ko hna lai. Asinain pakhat le pakhat itheihthiam le i kianh piak thiam in miphun khat sinak he lungkhat tein hi ni cu lungrualnak he kan hman tti khawh lengmang ding Laica in a relmi zapi forhfial le sawm kan in duh ko hna.

Chinmiphun Ni Sunglawi.
Pathian nih kan miphun thluachuah pe ko seh.

Leave a Reply

Your email address will not be published. Required fields are marked *