Unity, Integration, Integrity, Self- reliance
Monday May 1st 2017

Za Tlung Lian: CCN Sin Cakuat

Upatmi CCN hruaitu vialte le Celhzuamnak a chuak mi vialte hna,

Tutan 2016 CCN nih tuah mi celhzuamnak keimah pumpak ka hmuh ning tlawmpal langhter ka duh.

Tutan kan tuah mi hi voi dang he aa lawh lonak tam ngai a um in ka thei. Cu aa lawh lonak pawl cu atthatnak lei deuh lawngte an si fawn. Cu hna cu zeidah an si ti ahcun kan puai ahuap in zoh tik ah mino deuh lawngte kan si. Aa tel mi minung hi kum 16-26 karlak hi kan tam bik lai tiah ka ruah.

Mah vialte mino tampi lak ahcun buainak le zohchia ngai in a um mi minung ka hmu hna lo. Mah cu keimah pumpak in Norway um chin mi kan tthancho bak ka timi a si.

Mino pawl aa thei bal lomi zong an i chawnh dan ka hmuh tikah an lungthin an i awng inhawikom thar ngeih duhnak lungthin an ngeih mi ka hmuh hrim mi nih ka lung a nuamh ter tuk. Norway nunphung ah kan nau le an tthang anmah bantuk in hawi minung 1-2 lawng ngeih a za timi lungthin put lak in an tthan ko lioah kanmah chin mi le chin mi tiin komh duhnak an ngeih khawh mi hi ka thangtthat tuk hna.

Meeting a kai mi zoh tik hnaah mino lawngte kan si, lungsau tein atthu mi tampi lakah a chuak mi zong an um ve . Cu zong cu a phung si ko. Mah vialte lakah ka lung ah a um ngai mi cu CCN puai tuahnak aruang biahalnak tuah mi le an leh mi kha a si .Zeiruangdah hi bantuk puai kan tuah ti le zeitlukdah a herh i,tthatnak a chuahpi tihi an fiang kho tuk tiin ka hmuh. Mah cu i lawmh awk taktak a si tiah ka hmuh.

CCN hruainak in mah bantuk puai tuah mi hi atu 2016 hi a voi khatnak a si in ka thei , tuan deuh ah Hamer ah tuah cu a rak si nain CCN lawng in tuah mi a rak si rua lo. Cu lio kan cawlcangh ning le atu zong aa lo hrim lo. Tutan kan meeting i CCN celhzuamnak kan tuah ti lai maw tuah ti lo tiin biahalnak a um kha cu ” ziah kan tuah hlan in mah biahalnak tuah cu ” ti khi ka lung ah a um ngai. Nain mino lungput theih an duh caah a si la ti khi ka hei tuak tthan. A hnu ii 2018 tuah tthan ding in biakhiahnak kan ngeih kha cu ka hnangam lawlaw.

Tutan kan program le kan kal ning tete tlamtling kho tuk ka ti. Hi celhzuamnak nih aa tinh mi chin mi pakhat le pakhat hawikomhnak ser le fehter hi a tlinh tiin ka hmuh. Lentecelhnak ah dawtnak lungthin ngei butein nuam tein kan caan kan dih ter. Zuamnak lungthin ruangah hmurka in bia dawh lo le zoh dawh lo zongin cawngcangh khawh sual a si nain cu celhzuamnak dih cun lung ah i chiah lo tein tluang tein hawikomh tthan khawhnak kan ngeih mi hrim hi pehzulh lengmang ding ah aa dawh tuk mi lungput a si.

Hruaitu pawl hrim zong upat awk nan tlak tuk, nan lungsau puai tamtlin khawhnak ding ah khua nan khan mi nan batnak theih lomi a tampi lakah hmaipanh le nuam tein nan um . Nan mithmai zoh hrim ah a nuam.

CCN president le bang cu mah vialte mi lak ah sofa cung ah a it ve rem lo nawn in cu hrim cu cawnawk tlak le hruaitu ttha pakhat sinak a langhnak a si . Mah inn ah rem tein chungkhar he ihtti khawh a si ko lio ah mitkuh vuai lo le rem lo ngain kan puai tamtlinnak ah aa kan umpi mi hrim zohchunthlak taktak a si.

Cu lawng si loin convener zong hmunkip ah a tli meeting kip le thil dangdang tlamtlinnak ah auh in hal peng a si a bat lai ning cu a zoh lawng hmanh in mi tampi cu kan ba kho. A tlamtling taktak in a rian a lim amah bantuk tthihruaitu hi kan herh bak mi a si tiin ka hmuh. Midang tampi minchim khawh lo mi a cawlcang mi tampi nan ruang ah tutan puai tlamtling in a nuam khun.

Mah vialte tlamtling mi chung ah cun tlamtlin lonak le remh ding zong tampi a um kho. Hmailei ah remh kho usih ti ka duh ngai mi pakhat cu zan ihcaan kan suai ning hi a si. Ka chimcia bantuk in hnahnawhnak chuahpi ding mino kan tlawm thluahmah ,um lo ti khawh a si. Cucaah mino le mino hawikomhnak caan hi caan dang tein um kho seh law attha ngai hnga ka ti.
Zan ihcaan 23.00 kan timi hi mino saupi a tong lomi le aa thei thar mi caah cun a har ngai. Mino hi 23.00 ah inn zong ah a it mi kan tlawm te lai. Mipi lak lebang ahcun a har chinchin. Cucaah hmailei ahcun ihcaan hi tlai ter deuh in program hawikomhnak tete zong um kho seh law attha tuk hnga.
Tha bat le bawlung chuih ding ruang ah ti kha cu theihthiam a si ko nain i hngilh hlei lo caah khan a herh lomi a si ka ti. Cu pinah mah bantuk dinh a duh mi caah khan mah lei upa te nih khuakhan piak khawh a si ko . Cu te cu thleng kho u sih law mino lungthin zong zalong deuh in a um pinah hawikomhnak i tinh mi hi a fehter deuh chin hrim lai.

Mah vialte lak ahcun mino pakhat le pakhat nungak le tlangval duhnak a chuah ter mi hrim hi a biapi tuk mi a si tiah ka ruah. Hmundang cio kan um tikah chin mi nungak le tlangval a hmu lo mi kan tampi cu lakah mah bantuk puai tuahnak nih hin tonnak in duhnak a chuah pi, cu nih cun hmailei chungkhar sernak ah chin mi le chin mi funtomnak le pehtleihternak karhternak a chuahpi mi hrim hi zeihmanh nih cawk khawh lo mi a si ka ti . Mah bantuk tiang mino sin ah a chuak pimi a si ahcun CCN rianttuannak hi philh awk ttha lomi a si hrim lai.

Tutan CCN celhzuamnak cu tamtling kho tuk . Cu tlamtlinnak ah a cawlcang mi nan dihlak upat awk nan tlak ii upatnak keimah pumpak in kan pek hna, an in pek cio hrim hna lai. Miphun nan kan tthithruainak ah Pathian nih in umpi peng hram hna seh.

Lawmhnak le siaherhnak he,
Pa Tlung

(Note: Hi cakuat hi Norway Chin Unau Facebook Group ah cattialtu nih July 5, 2016 a rak thlahmi asi. CCN dawtu hna nih theih awk a tlak ko kan ti caah tu bantukin kan website ah kan rak taar naak asi.)