John Fredriksen  cu Norway ah cun ahopoh nih theih dih asi, aruangcu Norway mirumbik asi caah asi. Kum 2009 ah khan a ngeihmi phaisa hi Norway phaisa in billion 46, 1 tiah record an tuah. Apa cu NSB ah wielding arak tuanmi asi i,  anu hi kantin pakhat ah rian a rak tuan mi an si. Chimduhmi cu anulepa thawng in a rummi siloin, amah rian zuamnak thawngin vawleicung ah mirum pakhat asi khawhnak asi. John nih kum tin te Norway cozah sin ah a pekmi tax hi billion 4-5 lengmang asi. Ngandamnak zohkhenhnak le a dangdang bawmhnak a pekmi hi million in a za a phan cang. Mi nunsiang, mitha tiah min a rak ngei mi pakhat zong asi fawn.

Hi pa nih achimmi cu, Norway chawlehnak ka tuah chung kum 30-40 chung ah cozah akaimi hna nih an ka tuahto ning ka celh ti lo caah, ka company cheukhat (oil le tinbaw) ramleng ah ka lawngh cang hna lai tiah nai ah khan a chim. Azeiruangbik ah asi ti cu a chim duh lo nain, a huap in a chimmi ah, tax kong zong asi i, a tu amah chawlehnak he ai pehtlaimi zulhding phunglam a tu le atu an thlen, an remh than lengmang (Keimah dantat duh ruangah) caah ka celh ti lo ati.

Hi pa a chuah taktak ah cun, a company riantuanmi minung Norway ah 10, 000 hrawng an um si kaw, rian chuah haumi an tam lai caah ram pumpi nih a tuar khawh mi thil asi. Nain khatlei ah cozah minunng abikin ramchung chawlehnak minister a tuanmi Trond Giskes nih a chim vemi cu, hi kong nak in rian ngandeuh Norway nih tampi kan ngei, chimduhmi cu, buaipi tuk awk tlak thil asi lo tiah ati. John nih chimmi cu, Norway ram chung chawlehnak tuah nih a ka nengtuk cang ati, cubia cu Trond nih a leh ve i, kei cu ramleng ka um ah hin dakaw Norway hi ka ngaih tuknak ah ka zawt ve cu ati.

Socialist leftist party phaisa kong committee ah biachimnak nawl ngeitu Inga Marte Thorkildsen nih cu, tu bantuk ramdang ah ka ngeihchiah vialte ka kal pi lai a timi cu, tax pek atih ruang ah asi I, cucu vawleicung mirum 100 hmanh ah ai tel kho ve mi nih ningzak tuk awk asi, a duhnak poh ah va kal ko seh law khua va sa ko she, ramchung minung hna nih tax te kan pek cio ruang ah cun pei kan ram cu vawleicung hmanh ah umnak  athatbiknak ram pakhat ah ai cannaka si cu ati.