2015 – 16 ah a voikhatnak EC meeting cu 28.03.2015 sml 12:00- 16:00 tiang telefon-conference hmangin tlamtling tein tuah asi. Meeting ah khuakip aiawh in upa minung 7 kan kai kho, i Norway Chinmi phun huapin ttuanchuah ding herhmi tete ceihkhan-hnatlaknak kan ngei.
Atlangpi in kan ceihmi hna cu a tangleibantukin asi:
1. CCEU nih fundraising concert a tuah dingmi kong
2. CCN membership fee
3. Fund kawlnak kong
4. CCN advisor thimnak
5. CCN lunglawmhpinak Roca peeknak
6. CCAE nih a kan halmi Norway Chin Directory kong
7. 2015-16 CCN nih zeibantuk cawlcanghnak (activities) dah kan tuah khawh lai?
Tukum summer chungah Chin Community in Europe nih ai timh cuahmahmi fundraising concert cu Norway zongah July 02-12 tiang hmunthum ah tuah dingin timhtuah cuahmah asi. Concert ah Burma in hlasakthiam Van Siang Mang le Emily Par hna cu sawm an si i, Denmark, Germany, Sweden le Norway ram hna ah hlasa ding an si. Norway ahcun atlang piin, Oslo, Stavanger le Froland hna ah tuah ding asi.
“Tu bantukin Laitlang lei minung auhin concert timhtuahmi nih EU chung khuasa kan miphun hna pakhat le pakhat kan i naih deuhnak le kan i theih deuhnak asi lai caah thil ttha tuk asi,” tiah meeting kai vemi CCN Vice President Pu Leng Dun nih a chim.
Kan meeting cu CCN president Pu Sang Cung Lian lunglawmh biachimnak in le Pu Kyaw Kung thlacamnak in suimilam 16:00 ah kan dih ter.
Meeting kaimi zapi nih telefon chungin meeting kan tuah khawhmi cungah kan i lunghmuih ngaingai. “Phaisa a dih lo pinah mipum in kalmi meeting bantukin retheih caan peek a herh lomi hrim hi a ttha tuk ka ti. Hmailei zongah tu bantukin meeting kan tuah pi rih ko uh, minung tamdeuh zong kan i tel kho lai tiah zumhnak le ruahchannak kan ngei”, tiah meeting kaivemi Pu Lian Ling nih a chim.