January 4: British Pennak In Burma Luatnak A Hmuh Ni

Photo: VOA News

Nihin 04.01.2015 cu kan Burma ram nih Miraang pennak chungin luatnak kan hmuhnak kum 67 tlinni a si. Burma ram khualipi Naypyidaw khua ah hlunghlai ngaingai in cozah nih tuah a timh. Cuti an tuahnak ah tlaangcung mi ralhriam tlai hna zong an sawm hna. An i tinhmi hmui cu ram minung zapi nih President kha upat pek kha a si , cun President cu ralkap bawizik nih ral hriam hmuhsak pah in upatnak a pek lai. 

Kawl ralkap nih an i tlaih chihmi bia < Ralkap lawnglawng hi kan pa , kan nu > < Ralkap nih thazaang a ngeih lawngah Ram nih thazaang a ngeih lai > hna bang kan ram i nucan, pacan kan si tiah aa ruatmi ralkap hna nih mipi hmai ah zeitluk indah kan thazaang a tthawn tiah an ngeihmi ralhriam tthattha langh pah in President cu upat naak SALAM an pek lai. Cu an cawlcangh nak vialte thazaang va pek ve dingin mipi nih thimmi kan MP hna le kan upa hna zong an i tel ve lai.

A tu lio President cu a tu bantuk in mipi nih upat naak pek phu a si lo , cun hi tluk kan ram a si a fah lio ah hi bantuk cu cozah nih a tuah awk a si lo , tiin le a tu tan an tuahmi cu ralkap thazaang langhter duh ruang ceo ah a si a ti tu an tam ngai.

A zei bantuk hmenh khin miraang pennak chungin luatnak kan hmuh kum 67 a tlin ni cu sunsak ko hna hmenh seh law ram minung hna ca ah a sunglawi kho lai lo , a ruang cu luatnak ka hmu timi intuar cu ram minung hna nun ah a um lo.

Scroll to Top