CCN Secretary Report [Kum 2012 – 2014]

[Note: Hi chungttuan report hi CCN secretary nih a voi 6nak GM ah amah pumpak akai khawh lo caah a rak ttialmi report asi, meeting kai khomi hna caah ca in kan print piak hna]

Date: July 29, 2014
Place: Figgjohallen, Sandnes

Ahmasa bikah nihin chun ni kum 10 chung tiang CCN a dirkamhtu Chin mipi nan sinah lunglawmhnak chim ka duh. CCN hi Norway ram khuasa kan miphun nih ruahnak in siseh, lungthin, thazang le nan ngeihchiah tiang in siseh, nan dirkamhnak thawng in nihin chun bantuk in kan dir khawhnak a si. Nan cungah kan i lawm tuk ko.

CCN-EC [2012-14] upa hna hi July 19, 2012 ah Hamar khua ah tuahmi a voi ( 5 ) nak General Meeting pi nih thimmi kan si. November 10, 2012 ah CCN-EC hlun nih CCN -EC (kum 2012-14) kut ah rian chanhnak cu Froland khua Pu Lian Ling inn ah an tuah.  Cu ni ahcun avoi 1 nak CCN-EC [2012-14] meeting zong kan tuah colh. CCN-EC [2012-14] nih kan rianttuan kum ah EC meeting voi 4 kan ngei kho. A voi 1 nak ah minung 10. A voi 2nak ah minung 15. A voi thumnak ah khua aiawhtu upa 15 le obsever 4  le a voi 4nak ah minung 7 tiin meeting kan kai kho. CCN nih hruaiin meeting dangdang zong kan tuahmi a um len. Bianaah Chin National Day tuahnak kong meeting le Europe Chin Sport tournament tuahnak meeting te hna an si. Kan meeting ahcun rian ttuannak report peknak siseh rian I pawtzamhnak le zeitindah thazang kan chuah ti hna lai ti hi a biapi khun in kan ceih tawn. CCN [2012-14 riantuan kum] chung kan riantuanmi chungin langhter awk ttha deuh mi a tangleiah ka van langhter hna lai.

Chin miphun cu minung tlawm kan si pinah atu kan umnak Norway rammi hna hi kanmah nakin nunphung le ca lei ah a rum deuh ngaimi an si. Cubantuk miphun sin kan phak tikah kan nun phung le kan ca hi a hlei in ken kawi kan hau. Cu kongah CCN nih amah le a tuah khawh tawk in a tuan ve.  Kan miphun nih kan i ngeihmi (Tho/Fangerh/Khuado) tibantuk lungrual tein tuah khawhnak dingah avoi 3nak EC meeting (2013/CCN/04) nih (Tho/Fangerh/Khuado) tuahnak caah CCN advisor Pu Ceu Mang siseh Stavanger lei ah Pu Mang Chum siseh Oslo lei ah Bawi Dawt sihnaseh riankhinh an si. Stavanger leiah CCN hruainak in Tho puai tlamtling tein kan tuah khawh i Oslo lei zongah telpinak CCN min in kan ngei kho.

Chin National Day tuah zong hi CCN nih a upat i a tawlrel khawh ding khi tinh tuahmi cu asi. CCN nih a tawlrelmi avoikhatnak CND cu Stavanger khua ah 2005 ah hlunghlai ngaiin rak tuah asi. Cu lio ahcun, CND avoikhatnak philhlonak ca zongah cauk fate zong an rak chuah. Ram pumpi huap loin hmunhma cheukhat hna ahcun CCN nih hruainak in tuah asi ko nain, ram pumpi huapin Chin National day tuah nak he peh tlai zongin  CCN nih chunmang kan manh tawn nain kan tlamtlinh kho rih lo. Proposal tial ding le hmai a kan suangtu dingah Pu Ceu Mang ttuanvo pek a rak si (Avoi 1nak CCN-EC/03). Cu kong ah tlamtling tein ceih khannak a kan ngeih pi cang nain kum 2014 chungah CCN nih kan i hmaithlakmi rian a tam deuh caah kum 2015 lei ah ceih tthan te ding in kan thawn tthan (Avoi 2nak CCN-EC/04 le avoi 3 nak 2013/CCN/01). Aralai mi CCN upa hna zong nih ttha chinchin in an kan zuam piak khawh lai tiah ruahchannak kan ngei ko.

Norway khuasa kan miphun chungah ram nih theihpimi fimthiam cawnnak, rian thiamnak, mintthatnak a hmumi/ai limmi hna tampi kan chuah khawh ding hi kan miphun ahopoah nih kan duhmi asi bantukin CCN zong nih a duhmi asi i, a lawmhpi tukmi asi. Mintthatnak ahmumi hna le a sianginn ai limmi hna caah ram pumpi huapin lawmhpinak roca a ttial kho dih rih lo nain, Ragaland Chin National Day 2013 le 2014 lioah CCN min in lunglawmhpinak roca (Certificate of Appreciation) kan rak peek hna. Hmailei caan khat ah ram pumpi huapin roca peek khawh ding zong kan i zuam liopi asi.

Norway holh a cawng mi caah tthathnemnak a ngei hnga maw tiin Peter Sang Lian Thang tuahmi Norsk – Chin dictionary cu CCN tthithruainak in chuah a si bal cang. Avoi 2nak chuahmi cu copies 500 chuah asi, kommune zeimawzat zong nih kanmah Chinmi hna caah bawmhnak bantukin cawkpiak arak si i lunglawmh a rak um ngaingai. Atu zong chuah thannak dingin CCN-EC meeting avoi 2nak biachahnak 4 (iv) ah hnatlak pi a si. Peter Sang Lian Thang nih rian a kal pi cuahmah lio a si. Kan miphun caah thathnemnak a ngei hrimhrim ko lai tiah kan ruah. Cun CCN hmailei rianttuannak caah a herh ko tiin internet office box (Dropbox) zong a voi thumnak EC meeting biachahnak (2013/CCN/02 ) bantuk in ser a si cang.

Norway ram um kan si bantuk in an ram ummi nih theih a herhmi tete le an zatlangnun ah kan theih hrimhrim a herhmi tampi a um. Cu kong ah CCN nih Seminar/workshop tuah khawhnak dingah CCN  President Peter Sang Lian Thang le Pu Ceu Mang (CCN Advisor) cu avoi 2nak EC meting biachahnak 4 (iii) ah rian khinh an si tthan. Atu tiangin rian an kal pi chuahmah. Oslo, Skien, Bryne, Sandnes  hnaah  Seminar /workshop zong an tuah pi cang hna. Cun Stavanger khua zongah Stavanger Chin Organisation he ttuanti in seminar an tuah  khawh ti theih asi. Hi seminar ah khin, kanmah miphun chungin thil thei deuh an sawm hna lawng siloin, Norway cozah lei minung hna zong an sawm chih tawn hna. An tuahnak ah kan miphun hawi hna zong nih lunglawmnak he an cohlan hna. Cu lawng si loin Chin miphun Church cheutkhat hna nih lungthin thazang lawng siloin, Zion Baptist Church (ZBC) le Immanuel Baptist Church (IBC) le pumpakin Pu Ral Hup Thang hna nih tangka lei tiang in an bawmh hna caah kan i lawm khun ko.

Norway ram khuasa kan miphun nih kan herhmi a tam hringhran. Chin Directory in Norway chuah tthan ding zong kan herh caah atangleibantuk in CCN nih rian aa khinh  hna.  CCN Vice President Pu Kyaw Kung Mangling, Hmun Cung Nung (Vestland), Sang Tum Lian (Vest , Aug-Agder), Mamuani (Oslo Area), Aung Thein (Telemark ), Maipa (Midt Norge) , Sang Uk Cung le (Nor-Norge), Lal Biak Hum le (Nor-Norge) le Biak Lian Thawng (Nor-Norge) hna le technical lei ah Pu Thla Dun hna an si. Kum 2013, July 20, Hamar khua tuahmi  civui tanh in “Chin Directory in Norway” cu tlamtling tein kan chuah khawh. Achuah lawng si loin a zuar tiang in CCN Vice President nih tuanvo an kan lak piak rih. An cungah lung lawmhnak chimcawklo kan ngei tiah CCN ai awh in Chim ka duh rih.

CCN kan cawlcanghnak le Norway kong thawngpang theihherh tete Norway um kan Chinmi hna nih kan holh tein rel kho cio hna seh tiah, CCN website (meivan) kan ser i, ahopoah nih fawi tein zoh le rel lengmang khawh asi. Hi website hi kanmah Chinmi ca lawng siloin Norway le miphun dangdang kan kong an kan thei duhmi hna nih an kan rel/hlat khawhnak hmunhma zong asi. Norway Chinmi hna kutchuak cathluan le fimnak ca pawl zong hmunkhat ah chiah in bukbau bantukah hman khawh dingin kan i timhmi asi.  CCN nih kan ngeihmi ca – meeting record, reports, cathluan, cachauh vialte zoh le laak rel tthan lengmang khawh asi pinah tulio kan theih herhmi, cawn haumi konglam tete hna zong a thar in ttial piak lengmang khawh kan i zuam.   Website cu; www.norwaychin.no asi i, mizeipoah a lunglutmi nih nan kan bawmh khawh timi zong theihter kan nin duh hna.

Tronheim a phanmi kan miphun hna cu tlawn ah an tha ko tiah avoi 1nak EC meeting biachah nak kan ngeih bantuk in nikum ah CCN aiawh thlahmi Pu Van Thang (CCN advisor) nih a tlawn hna i hmunkhat riantuanti khawhnak dingah saduhthahnak zong an ngei ti (Avoikhatnak CCN-EC /8).  Cun CCN rian ttuannak caah aherh taktak mi annual fee khawlhnak zong a voikhat EC meeting biachahnak 1 nih tuanvo pek kan si than ve. CCN chungtuan, treasurer le mah le khua cio upa thimmi hna tuanvolak siseh ti asi. CCN khua kip upa hna le CCN treasurer nanmah thawngin riantuannak theipar kan hmuh khawh. Lunglawmhnak chimcawk lo kan ngei ko ti ka nolh duh rih. (annual fee athomi min list zoh khawh).

CCN nih biapi ngai in ai timhmi thil pakhat cu, Norway Chinmi karlak ah lungrualnak a karh khawhnak, pakhat le pakhat kan i kurit i rian kan ttuanti khawhnak caah asi khawh tawk in a bawmh lai ti khi asi. Cucaah CCN nih Chinmi, abikin chaklei Norway ummi Chinmi, hna he tonnak tuah khawh le biaruah khawh kha biapi ngai ah a rak chiah zungzal. 10.11.12 ah rak tuahmi CCN-ec meeting biachahnak No 8.1.d nak ah keimah cu chaklei Norway ah kal dingin le CCN kong theihternak tuah dingin Peter Sang Lian Thang cu fial a si. Ni hnih a va tlawn chung hna ah, khika ummi Chinmi tamdeuh he tonnak a va ngei kho, hmun 3 ah a taang ta manh i hmun hnih ahcun zaan zong a riak ta manh. Biachimnak le tonpumhnak zong an ngei kho hna i Norway um chung nuncanning le hmuhtonmi tete hna zong ceihhmainak an ngei kho hna.

EU ram hna ah kan miphun kan phan. Pakhat le pakhat i kil kawi le i zoh khenh kan hau. Cu caah lungrual te tanti hi kan herh hringhran. Lungrual te tanti khawhnak dingah pakhat le pakhat kan i kawmh kan i dawt a hau. Cu bantuk in EU Chin upa hna nih i hawi kawmhnak dingah khuakhan nak an ngei. Kum 2014 ah Norway ram ah EU Chin Celh zuamnak ngaih ding ti a si. Mah hi celh zuamnak tawlretu dingah CCN ttuanvo pek kan si nain kan mah CCN lawng si lo in NCCYF hna he rian ttuanti ding hnatlaknak kan lak chin ve. Cu kong ah NCCYF upa le CCN upa voi hnih tonnak kan ngeih hnu ah NCCF le CCN komh in Main Committee cu atanglei bantuk in ser a si (Avoi 3nak EC meeting 2013/CCN le NCCYF/02-03). Bugdet draft chuahpitu dingah atanglei bantuk in upa kan thim hna;

Rev Ceu Mang, Pu Cung Cem Bik, Pu Van Thang

Europe Celh zuamnak Main Committee

  1. Convener –     Pu Van Thang
  2. Abawmtu – Pu Cung Cem Bik
  3. Treasurer – Ngun Lian Thang
  4. Abawmtu-  Tial Za Hnem

Members

  1. Ral Siang Mang
  2. Pu Mang Chum
  3. Pu Mang Ling Kyaw Kung
  4. Za Cung Sang
  5. Val Ngun Thawng Mang
  6. Peter Sang Lian Thang
  7. Pu Hei Ling
  8. San Mary Lian
  9. Pu Hmun Cung Nung
  10. Rev  Peter Ngai Dam
  11. Rev Ceu Mang

Mahhi committee nih hin NCCYF mino khawm le Europe Chin celh zuamnak puai tuah ding tuanvo an lak lai. An rian tuannak nih aherh ning in sub- committee ser nak tiang Hamar khua tuah mi NCCF le CCN upa meeting biachahnak (2013/CCN le NCCYF/03) ah nawl pek an si. Nan theih cio bantuk in atu hi EU celh zuamnak puai an tuah chuahmah lio a si i rian an kal pi cuah mah lio a si.

Adongnak ah chimh ka duhmi cu CCN cawlcangnak ah lungthin insiseh ruahnak le thazang in siseh ngeihchih in siseh a kan tanpi tu pakhat cio nan cungah lunglawmhnak chimcawk lo ka ngei ko tiin.

Sang Peng Ling

Chungtuan [Secretary, CCN]

Secretary Note; Acunglei CCN kan riantuannak report ka tuahmi hi report file chia loin hmurka in report tuahmi a um pah caah fiang taktak in kan langhter khawh lomi a um ah cun tuanvo ngeitu sinah fiang deuh hal khawh a si.   

PDF Version in rel na duh, i fim na duh ahcun: Hika Secretary Report (2012-2014) ah la.

1 thought on “CCN Secretary Report [Kum 2012 – 2014]”

  1. Dear CCN le Norway um Chinmi,

    Chin Community in Norway, tiah Norway um Chinmi nih kan ngeihmi hi a ttha tukmi le kan miphun nih a herh bakmi a si. Khua 60 hrawng ah Chinmi kan um i rianttuan a harnak tampi lakah a minte a dir khawh peng mi hmanh hi zaanghlei cawi in a ttuantu kan ule kan upat tuk hna.

    Kan ram ah cun um usih law hi bu/rianttuannak hi a herh lo kho. A um lo zong ah a rak poi lo, nain Norway le mi ram cu chim lo Kawlrawn i kan um hmanh ah a rak herh cangmi miphun pakhat nih a herh tukmi bu/riantuannak a si. Norway chinchin ah cun kan miphun kong ah a biapi ngaingaimi bu le rianngeitu a si.

    A biapimi bu le rianngeitu a si ti a thei lo i a ruat lotu zong tampi um khawh a si bantuk in a thei i a ruattu hna nih rianttuantu hna i chungkhar le rian pinah zaanghlei an i khinhmi cung ah a tlamtling lomi lawng hmuh khawh a si. Cu tikah tha pek duh lo khawh a si. Tha kan pek lo a si ahcun rianttuantu an i phakzo lo hlei ah ttuan duhmi zong ttuan awk ttha lo in chinmi tthiam nih rak dawnh le dotla ah chiah piak lo ahcun a min pi lawng, GM hmanh ah minung 20 tling lo dirhmun a phan kho ko.

    Atu ah mah tluk in Chinmi 2000 deng lak i tlawmte lawng nih buatseihmi, zeidang a um ah za tiin vawlei lei le miphun sinak kong ah hnu chittakmi CCN nih a rianttuannak a thanhmi zoh tikah lung aa lawm. Kan miphun nih kan herhmi a kapkip in dawt le thazang pek hi i zuam usih law hi nak thil ttha hi kan miphun caah a tuah khawh ko hnga hi teh ti ka ruat. Directory nih mi tampi a kan tthathnempi, i dictionary hoi hna cu fimnak a duhtu le a dawtu hna nih cun an lawmh hrimhrim lai, an hman lo hmanh ah. Asinain mi tam tuk nih Norway holh le ca kan i thiamnak.

    CCN nih tuah ding a tlolhmi a tampi ko. A tuah khawhmi nih a kan thathnempimi a tam tuk fawn. Cucaah ziah a tlolh timi zoh a hau hnga i, Chinmi nih kan miphun le Chin thisa kan ttanh ning a langhter ngai lai. Kan miphun hi a phunkip in ttanh le dawt kan thiam lo cun miphun, miphun, miphun min in hika kan phakmi te hna zong cu duhsah tein mi-phun ah kan cang tak sual kho men. CCN hi pumpak riantuantu kan uar hna lo zong ah kan miphun a si timi lungput he kan ttanh le kan ruah a herh zungzal ko lai.

    Atu cu Norway ah kum 13 chung Chinmi kan lut cuahmah i tu hnu ah CCN hi kan herhnak a tam chin lengmang lai. Kan mah pumpak caah a hlawk ding a si lo, a tthahnem ding a si lo tiin maw hnuchit in zeirello in um sual lai usih, chin miphun kan dawt tak ko a si ahcun.

    One Way, timi te khi kan i faksak ciomi bia a si. Norway ram khuasa nu le pa, u le nau vialte Chin Community in Norway hi thazang pe hna usih, daw hna usih, ttanh hna usih, upat hna usih le dirpi hna usih. Mah le mah aa dawmi hi Pathian zong nih a bawmh hna, miphun dang zong nih an bawmh duh hna. Cu bantuk cun Israel a ttanh tuk i aa tahchun pengmi zumtu Chinmi hna nih Israel nih Israel miphun a dawt bantuk in Chin miphun nih kanmah miphun te hi Pathian pekmi a si miphun tiin daw ve hna usih law cucu Pathian duhnak zong a si ko lai, tiah ka zumh.

    Thlarau mit kan auter seh law kan miphun zong tthawng in tthangcho ko seh. Cucu Carson siangbawi te nupa an rak rat lio tiin nihin tiang Chin khrihfa bia ah aa tthen kho lo ding, “Thawngttha thawng in kan mit a deinak,” cu a si ko lai. A mitdeimi nih miphun daw lo in a um bal lai lo.

    Nan zapi upatnak he
    Bawi Mang Lian

Comments are closed.

Scroll to Top