Photo: Facebook/CCN

Chinmi nih kan ngeihmi puai lakah a sunglawi bik tiah ruahmi ‘Tho/Fanger/Khuado/Khu’ puai cu Norway a palinak khuapi asimi Stavanger ah tlamtling ngaiin tuah asi. Hi puai hi Chinram chung ummi miphun dangdang hna nih anmah le holh cio in min an rak ngei hna cio hna, a min in i dang hna hmanh seh law, an tuahnak a sullam taktak a muru cu ai khat hna.

Hakha-thantlang lei nih Tho tiah an auh i, Tedim nih Khuado ti zong in an auh. Chinmi chungin Matupi, Mizo, Kuki, Asho, Mara timi pawl zong nih anmah le holh cio in hi puai min hi an rak ngei cio ve hna. Tuahning sullam a tlangpiin ai khat dih hna i kum ai thlenmi hmelhchunnak asi ve fawn caah Chin Kumthar (Chin New Year) tiin mi tampi nih theih a hun si ve cang. Ram dangdang um Chinmi tampi nih cun Chin Kumthar ti min tlangtaar in lumsa ngai le nuam ngai in an tuah cio hna.

Photo: Facebook/CCN

“Tutan Chin Tho-Fanger-Khuado-Khu hi Chin Community in Norway nih a tlangtlakmi puai ah a voikhatnak asi ko nain, mi 100 renglo an rak chuak kho i, kan lung a hmui ngai ko, hmailei kan tuah khawh rih ko ahcun minung tamdeuh pi chuak in hlunghlai deuh ngaingai in kan tuah khawh te lai tiah ruahchannak nganpi ka ngei”, tiah tu puai tawlreltu (Convener) Pu Mang Chum nih a chim.

Photo: Facebook/CCN

Hi puai ah biapi in biachimtu minung pa 4 an si, Tho ai semnak kong chimreltu dingah Pu Adam Ral Hup Thang le Pu Hre Tum hna thim an si. Tho kong he pehtlaiin forhfialnak chimtu dingah Pu Thawng Uk sawm asi i, Chin Community in Norway (CCN) kong tawi chimnak le CCN nih hi puai a tuah hnawh channak ai timhmi fianternak chim dingin Peter Sang Lian Thang hna cu thim an si. Puai kong tawlreltu hna cungah lunglawmhnak le bia tawichimnak zong a um rih i cucu, Stavanger khua lei in Pu Van Thang nih a kan chimh.

Phto: Facebook/CCN

Biachimnak lawng siloin hladawh saknak zong a um len, Stavanger um Chinmi chungin awttha hlasak thiammi hna le Rogaland chung khua dangdang in hlasak thiam tete hna nih lungtho ngaiin le nuam ngaiin hla a kan sak piak, an hlasak nih mi thinlung a thawh ter lawng siloin khuaram ngaihnak le khuaram kong tuak tthannak zong a chuah ter.

 

 

 

Leave a Reply

Your email address will not be published. Required fields are marked *