Uipi Farual

Hlan loiah uipi le uitum an rak um ti a si. Voi khat cu khual an tlawnnak lampi ah an nu cu a paw a fak i naungei ding a si. I dor nakding le an thei fawn lo. An nu cu a paw a fak chin lengmang i tuarh lo hnu ah cakei kua ah hei hmuh i cuka ah cun fa cu an hrin, An nu nih cun ,”Hika zawn hi cakei kua a si lo maw, cakei a rak ttin tikah an kan seh dih lai lo maw, kan i tthail ah a ttha lai,” tiin an pa cu a hei ti.An pa nih ,”Um ko,kan chimhning in na tuah ahcun an kan seh bal lai lo,” a ti, An nu nih ,”Zeitindah ?”a hei ti. An pa nih ,” Cakei a rak rat bakin na fale kha na ttahter hna lai i ,zeiah na fale cu na ttahter hna ka von inti lai i.cakei theih dingin,cakei sa an hawt ruangah an tthap ko hen cu tiah na rak ti lai. Cu tikah kei nih a cu ngai aa ton thiam tak cu…..cakei a rat loi a si ko khih ka rak ti lai i nang nih na fale kham ka fale ngam uh ,ngam uh nan hawtmi cakei a ra ko khih, na pa nih an sehpiak hna lai tiah nati lai,” tiah an nu cu a chimh.

      A cu tlawmpal ah cun cakei cu a rak ttin taktak.Uipi nihcun a fale cu a von ttahter hna i an pa nih cun, “zeicadah na fale cu  na ttehter hna,” a von ti. An nu nih cun,”Cakei sa kan haw an ti i an ttap ko hen cu….” a von ti.An pa nih cun,” A cu ngai a vaa ton thiam cu dah,cakei an rat loi a si ko khih,” a hei ti. Cakeipi nih cun an bai an theih tikah a ttih tuk hna i a zam tak hna, ti a si.

Cuticun cakei cu a tli i ,zawngte te an i tong .Cakei nih zawngte cu bai a hei ruah lengmang i bailam peh ah calei nih cun zawngte cu an kua chungah uipi farual an umnak long kha a chimh, Zawngte nihcun,” A cu tluk na vantthat cu zarh khat chung sa ei ding pei na ngeih cu,”tiah a ti.Cakei nih cun,” A cu nemmam cu… na fale rual nih cakei sa kan haw an ti i an pa nih a kan hawl lioah kan va pha suak i an pa nih cun cakei sa nan hawtmi cu a tu a rak phan ko khih a ti thawng ka theih i ,thih cu ka ttih ve i ka zaam zokzok ,” tiah zawngte cu a chimh. Zawngte nih cun,” A cu na va hruh cu…. nanmah cakei cu aho nih dah an in tei bal. Ra, keimah nih kan kalpi lai i na seh dih hna lai,” a ti i a kalpi.

Uitum nih cakei le zawngte an rat cu a hei hmuh hna i,” A ce” atutan cu cakei nih a kan seh dih cang ko lai hi teh,zawng bawtor pa nih pei a chimh i kanmah seh dingin an rak rat ko khi,” tiah an nu cu a hei ti.An nu nih,”Kan thih le thih atu noi khat hmasa kan ti ngin in khan kan ti rih hnik lai i a zam lo ahcun zei ti awh ttha,”ati. Uipi nih cun a fale cu a von ttahter hna i an pa nih cun, “Kan nu zei ruangah dah na fale an ttah hoi,” a hei ti i an nu nih cun,” cakei sa kan haw an ti i an ttap ko hen hi,” tiah cakei theih dinhin a von ti. An pa nih cun,” A cu nan van tthat cu! Cakai pi le zawngte an ra ko khih, cakei sa he zawng sa he nan ei ko lai hih,” tiah fak nawn pi in a vonti. Cakei pi nih cuti an ti cu theih i a ttih tuk ah lo pher a zam tthan.Zawngte nih cun cakei pi cu a dawi i ,” Ka kawi cakei ,zeiah na zaam e, ” tiah a hal.Cakei pi nih cun,” Zeiah ,ka zaam lai lo,thih cun na ttih ve ko cu ta,”tiah a leh, Zawngte nih cun, ” Uipi nih cun an teibal lai lo e,” a ti i cakei pi cu a lem langmang .A hnu ah cun cakei pi nih cun,” A sile kan mei kan peh lai i hmuh khat ah kan kal lai,” a ti i an mei cu an peh,

Uitum nih Zawngte le Cakei pi an rat tthan cu a hun hmuh tthan i a tu cu kan thih ni a si cang ko hi ta ,a tu cu an mei an peh i peh an rak rat ko khi tiah an nu cu lung rawk ngai in a chimh. An nu nih an pa cu voi khat kan ti nginte in khan kan ti lai i an zam duh lo ahcun an kan seh ko lai ta a ti ve. Cakei le zawngte cu uisa kan ei cang lai ti phun khin an ra thluahmah ,Uitun nih khan hmasa an tininh bantuk te khan,” Ziah nau cu an ttha hoi ee,” a von ti .”Cakei sa an haw i an tthap hoi ko hen hi,” tiah an nu nih cun a von leh. Uitum nih cun,” Um,,,, kan hnulei i an rat loiah khan zawng bawtor nih a zampi mang i ka seh manh hna lo.Atu cu an pahnih in ka åhanh hna hlan lo, ka dawi cang hna lai. Ka fadawt le tthater ka siang ti hna lo…. khoi kawl hna ngin luau…” tiin a con i cerhor ciammam i cakei cu a thin a phan tuk ah thih ngamh in a zam.Zawngte cu cakei mei nih cun a dawh chih i thingpi ah aa su .Cakei nih cun a zam tak i thinghram ah lungfim loin a um. Cu lioah  cun uitumpi nih ,” Khah….mifim te ra ko ne, na sa te cu hung kan dang ko ne,” tiin a seh i ,an bu lei ah aa tlikpi ti a si.

1 thought on “Uipi Farual”

Comments are closed.

Scroll to Top