India-Myanmar Ramri ah Chin Hngakchia Minung Pa 3 an Tlau

Tualkhiang (Chin ramkulh):   Chin ramkulh chaklei Cikha peng India -Myanmar ramri Tualkhiang khua in kum (6) hngakchia minung (3) hna cu 02 vaute 2012 ni in khan an tlau i nihin ni tiangah an hmu kho rih hna lo tiah thawng kan theih.

Inn (20) minung (100) leng an umnak Tualkhiang khua ah hin a luancia kan hnu vaute (02) ni ah khan khatlei varal India ram Manipur ramkulh leiin thil phur mawṭaw pakhat cu a rak lut i mawṭaw mongtu an um lo lio caan ah hngakchia pathum hna nih mawṭaw cung i eidin pawl hna kha an fir le an zam tiah Zomi minung covo lei foundation lei in Ko Min Than nih a chim.
“Mawṭaw mongtu pawl an um lo lioah mawṭaw cung i eidin pawl hna kha hngakchia pawl nih an lak lio kha mawṭaw mongtu nih a hmuh hna caah India ralkap kan tlaihter hna lai tiah a hro hna le hngakchia nih an ṭih caah an zam” tiah Ko Min Than nih cun a chim.
Vaute (04) ni ah hngakchia pathum a hawlmi hna Tualkhiang khua pawng Haicin khuami an i citmi mawṭaw cu ai let i, minung (5) fak piin an i hliam ti zongah theih a si. “Hngakchia an hawlnak in an rak kir leiah Manipur leiin Haicin khua leiah No. (407) thil phur mawṭaw pakhat kha an van i cit, an van zulh. A mawṭaw brik a poh ruangah lamthlang ah a tla, fak piin hliamhma a tuarmi minung (5) hna cu Lamka siizung ah an kuat hna” tiah Ko Min Than nih a chim.

Tualkhiang khua cu India ram Manipur ramkulh le Chin ramkulh Cikha khua karlak ah a ummi ramri khua pakhat a si. Hngakchia minung (3) an tlaunak kong he pehtlaiin cunglei nawlngeitu hna sinah thawngthanhnak zeihmanh a um rih lo tiah theih a si.

Dinnak kha a cat lomi tiva bantukin luanter camcin ko u (Amos 5:24).

Scroll to Top