A Va nih a Vuakmi Nu a Nunnak Lungrethei Asi

Tu thla 03 vaute 2012 ni zanlei suimilam (17.00) hrawngah Sagaing ramṭhen Letpanchawng khua um Lal Than Tluanga (19) nih a nupi a vuak i a lu i a tuknak ruangah a nunnak kong lungrethei in a um tiah thawng theih a si.

A vuakmi a nupi Mapuii cu hngakchia thla(8) lawng a si rihmi i a nu a si i atu nihin ni tiangah hin lungfim loin a um kong le khua caan ah a lungfim caan fim lo caan tiin a um, atu tiangah ṭha tein a lungfim rih lo tiah theih a si.

Misual pa Lal Than Tluanga cu a nupi lu a khuai lawng hmanh siloin a pile (a nupi nu le pa) tangka sing riat (Ks 800000) zong aa zaampi fawn rih tiah an ti.

“Mah ni ah cun Mapuii i a nule kha biakinn ah an kal le anmah nuva lawng inn ah an um, hngakchia a ṭah tuk kha ka theih caah a va zoh cu Mapuii cu ṭuang laiah thisen he a rak ril ko, palik sinah thawng ka hei thanh colh hna le Kalaymyo siizung pi ah an kalpi colh” tiah an inn pawng (an innpa) i a ummi pakhat nih a chim.

Misualpa cu palik le sang chung nawlngeitu hna nih nihin ni tiang an hmuh rih lo kong, mi a cheu nih cun varal, Mizoram leiah a zam cang lai tiah a zumh kong an chim.

Misualpa Lal Than Tluanga cu India ram Mizoram Khanpui khuami a si i Mizoram ah Mapuii he an i umh hnuah a nupi khua a simi Letpanchawng khua ah 2011 dipa (december) a dih lai zarh in an i ṭhial, an um tiah theih a si.

Scroll to Top