Falam (Chin ramkulh): Chin ramkulh Falam khua le Rihkhawdar karlak a hlatmi khualtlawng mawṭaw(Jeep) cu 08.02.2012 ni ah ruahlopi in aa leh caah khualtlawngmi minung(2) nunnak a liam tiah thawng kan theih.
Khualtlawngmi minung (16) nih an i citmi jeep mawṭaw cu Falam khua in 08.02.2012 ni zingka in a chuak i, suimilam 09.00 am hrawngah a brik a poh ruangah lamthlang hor chungah a tlak hi a si tiah theih a si.
“Mawṭaw a brik a poh ruangah lam kilkawi zawnah a chak mer manh a si ti lo caah hor chungah a tla” tiah ramri ah a ummi khuami pakhat nih a chim.
Cu mawṭaw aa lehnak ruangah cun Falam peng Ngalti khua in Pu Kio Ling (58) le Hnahthial khuami Khuangsailo cu mah ai lehnak hmunah cun an thi colh i minung (6) an i hliamkhawng tiah theih a si.
A thimi Pu Kio Ling i a nupi zong a El a kiah caah Falam khua siizung ah an kalpi tiah an chungkhar a simi pakhat nih a chim.
Atu i aa letmi mawṭaw(Jeep) ngeitu cu Pu Hrang Lawm a si i, atu hi a mongtu pa cu a zaam tiah theih a si.