Unity, Integration, Integrity, Self- reliance
Friday September 21st 2018

Bondevik nih Bryne Khua ah Kawl Ram Kong a Chim

10.01.2012 ni Bryne khua , State Church ah tuahmi Kawl ram kongkau chimnak hmun ah kan khua in minung zeimaw zat kan i tel kho ve i cuka ah ka theihmi bia tete le hmuhton mi thil kong tete cu zapi ca ah siaherh nak he a tawinak in ka hun ttial.
Tuahnak hmun , a ra khomi le an caan hmanning
Bryne State Church ah a si. Biak Inn cu chanthar design in sakmi a si, a ngan ngaingai fawn, minung zali hrawng tlum a si i a ra mi cu kan khat thipthep hna.
Rogaland chung in kan Lai mi minung 30 hrawng kan i tel kho ve. A ra khomi chung in Lai thuam aa thuamhmi hi minung panga ka hmuh hna i cu chung ahcun Rev. Magna aa tel ve. Ruahlo tuk in Kvinnesdal khua i a ummi Norsk pakhat ka hmuh ve , cu nu i a fapa cu Karen miphun a si. Egersund i Norsk pawl zong ka hmuh len ve hna. A ra khomi chung in a tamdeuh cu kum 60 cung deuh an si hna. Caan tlaitu cu caan tlaih le biachim a thiam ngangai i a dakral ngai fawn.
Bryne an khua bawipa nih lawmhnak le donnak biatawi a chim. Bryne khua ah a ummi Kawlmi ramzam pawl kong ( an dirhmun ) a chim phuan.
Hlasak thiam pawl ( Janne Lind le Øystein , cun Fri maa phu ) nih manlo in an tel pi ve hna. Hlasak a tam ngaingai. Kan Lai mi chung in hla an sa ve te ttheo lai tiin kaa ruahchan ngai nain an sa ve lo. Salai Ram Thang ( Bryne )cu kan ram le miphun kong tawite biahal nak an ngeih hnu ah amah nih biatawi a chim ve. Mino te a si ko nain aa zaa ngainagi ve ko.

A tuahtu

Hi Kawl ram kongkau chimnak a um khawhnak ding ah a tawlrel tu cu Tore Nærland a si i amah hi Bike for Peace timi Bu ah hruaitu a si. Hi Bike for Peace timi bu cu thirrang ( Sykel) in vawlei cung ramkip ah a tlawngmi an si. Cuti an tlawn pah cun human right kong le democracy kongkau a aupi mi an si. Kan kawl ram zong ah voi 2 hrawng an va tlawng kho ve cang. A hnu bik an tlawn tan ahcun Daw Suh Kyi zong an va leeng kho ve tiin theih a si. Hi kawl ram kong chimnak a tuahtu lak ah Rogaland Burma Foretning zong an i tel ve tiin thawng an thanh ( sawmnak ca chung zong ah a um ).
Hiti kawl ram kongkau chim tik ah an i tinhmi hmui pathum in ka hmuh.
I : Daw Suh kong le Kawl ralkap cozah kong chim kha a si bik ca ah cu kongkau chim ding ah cun khahlan PM a si mi le a tu ah Oslo Centre hruaitu le founder  a simi Kjell Magna Bondevik cu an i sawm.
II : Tore Nærland le a hawile pawl kawl ram an va tlawn lio ah Ygn khua i a ummi mitcaw zohkhenh nak siang inn pakhat an va hmuh. Cu mitcaw siang inn bawmhnak ca ah phaisa kawl piak zong cu an hmuitinh a si ve.
III : Jæren chung ah Krf member pawl cawlcangh nak le zei tluk in dah human ringht le democracy an dirkamh ti langhter duhnak zong hi an hmuitinh pakhat a si ve ti khawh a si.
Kjell Magne Bondevik le a chimmi bia
Kawl ram kong ka chim tik ah Kawl miphun ” Burmesere ” ti ka hman tik ah cu nih ram chung miphun vialte a huap dih ko hna ti kha rak ruat thiam te u tiin biahram a domh. Daw Aung San Su Kyi te chungkhar kong deuh hi a bikk in a chimmi cu a si ko. Kan Burma ram tuanbia zong tawite a chim. A biachim cu ngaih a nuam ngaingai ko , Pastor hlun hrat cu hlasak zong a thiam ngaingai fawn.
A dang a chimmi chung in ka theih tawk le ka sian tawk cu a tawinak in;
–       Myanmar hi kan hmang lai lo Burma tiin kan hman lai , cucu ASSK duhnak zong a si
–       A liamcia kum 25 chung ah Norway ram ah democracy phung a kar deuh ngai ve bantuk in vawlei cung ram tampi chung zong ah a karhcho ngaingai ve
–       Burma ram zong ah democracy phung cu a hung nung pah ve cang
–       Burma ram ah vawlei chungchuak thil mansung tampi a um i a rum ngaingai mi ram a si
–       ASSK a vapa ( Professor michael aris ) he aa daw ngaimi hawikom kan si
–       Cancer zawtnak in ka thi dengmang cang i ka thih hlan te ah ka nupi hmai hmuh ka duh ko a timi Micle Eris cu Burma ram chung ah luhnak nawl an rak pek lo cu minung ruahnak an ngeihlo tuk bia a si ( hi bia a chim lio ah a ngaih a chia )
–       Burma ram chung ah zalen nak a um taktak rih lo ca ah pehzulh in kan ttanpi hna a herh
–       A tu lio Burma cozah nih a zeimaw zawn ah ram chung mipi aw le aan an ngaihnak a um , nain ram chung ah daihnak a um rih lo
–       Burma ram ah a zeimaw zat democracy le zalen nak a ummi te kha thazang pe hna u si
–       A tu lio Burma cozah le NLD an i pehtlaih nak kha a hman kan thiam a herh
–       ASSK nih ram dang ka tlawn khawh tik ah a hmasa bik ah Norway kan tlawng hna lai a ti
D  Donghnak
Biachimnak a dih in biahal a duh nih hal ding ah caan an hun. Biachimnak a dih hnu ah Bondevik zong hla ( foot ball hla ) a sa len ve. Biak inn chung i mah bantuk hlasak cu a sia a rem pah ve lo. A tu Kawl ram kong chimphuan nak caan hmannak ah tangka a dihmi ca ah le Ygn i mitcaw siang inn bomhnak ca ah tangka an kan kholh.
Bryne khua ah a ummi kan miphun hawi hna le Stavanger i Sianghleirun a kai liomi kan naule pawl nih lunglomhnak in pangpar an pek. Rogaland Burma Foretning pawl tu nih cun an pe ve lo. Cu ticun caan cu a dih i a huam poah nih hmaan kan thlaak pi cio dih hnu hna ah inn lei lam kan panh cio hna.
lawmhnak bia, thangtthat nak le forhfial nak
10.01.2012 ni cu rian ttuan ni a si pin ah ruah a sur ngaingai fawn. Kan miphun chng in a cheu cu rian ttuan dih ka, thabaak hnu ah le a cheu cu rian ttuan lo bak in a cunglei caan hmannak ah an rak i tel khawh cio nak cung ah pumpak in ka lawm ngaingai. Cun Bryne khua ah a ummi kan miphun hawile hna nih a tu bantuk in an pawngkam norsk pawl he pehtlaih nak ttha an rak ngeih khawhnak cung ah ka lawm khun. Minung covo le zalen nak a ttanh i a upat mi Norsk pawl hrimhrim cu ka thang tthat tuk hna. Kan miphun pi ning in minung covo le zalen nak cu kan duh tuk tluk in kan ttanh i kan upat kho cio hna u si law a ttha tuk hnga. Cun kan umnak khua cio ah kan i ngeihmi bu le phu kip nih pawngkam norsk pawl he pehtlaih nak ttha kan ngeih khawh cio ding hi a biapi ngaingai.Kan sermi bu hna i thahri le a tha zaang cu register tuah le tuahlo ah khan a um lo , zei tluk in dah pawngkam minung hna he pehtlaih nak ttha a ngeih timi chung ah khan a um deuh kha i fiang cio in dinfel nak he i zuam chin cio hna u si.Kan Kawl ram minung hna kan intuar nak cu vawlei pi nih a kan theih , a kan bawmchan duh mi an tampi , kanmah lawng kan si ti lo. Kan ram ah daihnak meici hmete a chuakmi nih kan ram pumpi le vawlei pi cu ceuh kho hram seh.
Lawmhnak he,
Van Thang
Secretary , CCN & SCO
A tanglei link ah Bike for Peace cawlcangh nak cu tamdeuh in rel khawh a si.
A tanglei link ah Oslosenteret rian ttuannak tam deuh in rel khaw a si
www.oslocenter.no/
Photo credit: Tha Hlei Cung Na min le na kum, na
(Atanglei biaruahnak hi CND 2017/2018 Committee, Rogaland, Information Committee member pakhat asimi Vaal Mang Bawi Lian
CCN nih kan in remh piak lai. Na mawtaw EU Godkjent na tuah i an
Norway ah Chinmi tampi umnak Rogaland ah Chinmi upa 31 tluk telin 'ton biaruahnak' cu
  Norway Chin Christian Youth Federation tawlrelnak in 2017 Summer chungah concerts hmun 4 ah