Kachin ramkulh chung Kawl cozah ralkap le KIA karlak i an i tukdohnak a fah chinnak hmunah Kawl ralkap nih an hmanmi ralkap helicopter pakhat cu KIA lei nih an kappiak hna tiah thawng theih a si.
Mah helicopter cu Moemoh leiah tuthla (4)ni ah an kah hi a si i, a thi le a lo an um le um lo tu cu fiang in theih a si lo tiah KIA lei nih an chim. Kaphnih ralkap hna cu lamnaih tein kan um hna i nichiar ti awkin kan i kap peng ko tiah KIA in Bohmuchok Kon Maw nih a chim. Tangkawng(january) ni(5)ni ah khan KIA le Kawl cozah kosale pawl cu ton biaruahnak a ngei ding kan si nain kaphnih leiin ral i tu dingah timhlamhnak a um ruangah kan i tong thai lo ti zong a chim chih.
Atu hi Kawl cozah nih KIA an zungpi umnak Laiza cu 2012 tthal chungah a hram in bongh i laak viar dingin timhlamhnak an ngei ti zongah theih a si. Hi an zungpi Laiza laak khawhnak dingah hin Kawl cozah nih raltuknak vanlong le helicopter hman a timh ti a si i, a herhhaimi thilri le hriamnam kuatnak ah tlanglong hman a timh. Atu hi biatak tein tuk a timh caah a ralkap tatmah (33),(66),(88) le (99) pawl hi bitak tein hman a timh cang hna. A cheu cu a kuat pah cang hna i lampi an kal lio a si. A cheu cu Meihthilar ah an um lio a si. Kawl cozah nih KIA tuknak dingah hin Kawl ralkap cheuthum ah cheukhat hman a timh tiah theih a si.