Norway Lainawng Pa Kong

Amin ah Anders Behring Brevik, a kum 32 (chuahni; february 13, 1979). Krihfa fak deuh in a tanhmi le miphun fak deuh in a thanhtu le muslim a hua ngaimi asi.

Oslo bompuah ding le meithal in mi a tam khawh chung thah ding in ai timhtuahnak kum 9 chung asi cang. Zeitluk lungsau lainawng dah asi! Khuaruahhar minung cu asi ko. Thil cannak in ni 2 a hun kal cang, Oslo khua bompuah hnawmtam hna zong an hun thianh khawh pah i, hmapu le mithi kawl zong an hun ngawl, ruakhumhnak zong tuchun ah an tuah cang.  Tu bantuk in  zapi mitthli he kan ngeihchiat lio ah palik le a dang ttuanvo ngeitu hna cu an i din bal lo, chunzan in hlathlainak a phunphun in an tuah, hmailei hi bantuk thil a can tilonak caah zeitindah kan kham khawh lai, tubantuk thilcang ding timhtuahmi dang hna a um ti maw tibantuk biahalnak a thongza in an tuak, khua an khan rian an ttuan.

Lainawng pa zong cu a kong amah tein ai chimmi siseh, online ah a cawlcanghnak  pawl hlathlainak an tuahmi ah a kong tamdeuh pi theih a hun  si cang. Akong tamdeuh deuh theih ah, a luancia ni 2 lio ah rak puhdah ning kong a hun i thleng ngaingai. Apakhatnak ah rak puhdahmi cu, islamist terrorist an si lai, si lo hmanh ah anmah he ai pehtlai lai tiah rak ruah colh asi. Kan rak mawh ve lonak zong cu, hi bantuk thilcang mi dihlak ngawt in, Islamist Terrorist buu hna nih kanmah kan si tiah i phuannak a rak um lengmang.

Target?

Tutan thilcang zohtikah a hmasa ah a target fiang ngai in hmuh khawhcolh asi mi cu, Norway cozah kai party (AP ) an si. AP zungpi ah bom a puah i AP mino pawl camping an tuahnak ah palik thuam he meithal he mi 85 (tutiang theihmi mithi) a nawn hna. AP cu mizeidah an si? Norway political party vialte lakah nganbik asi, tulio cozah kaimi party pawl lakah ai telmi zong asi fawn. An policy tlangpi cu, mizei poh nih rian kan ngei dih lai, covo i ruang tein ngeihnak le ai ongmi miphun sinak hna kha a tanh. Sicun zeiruangah hi lainawng nih hi tluk a ttha komi party le rianttuantu minung hna cungah lungfahnak a ngeih?  Lainawng a sihni pa nih a chimnak ah cun, ram chung uknak phung a thlurpi in thlen a duh, dohthlennak fakpi (revolution) a duh  ati. Tamdeuh in a tanglei ah kan zoh rih hna lai.

Nationalist, anti- multiculturalism

Breivik nih www.document.no website ah a tlawmbik ca  75 a rak ttial bal. A ca zoh tik ah a ruahnak a lang ngaingai.

Cun lainawn ni july 22 ah hmai 1500 asimi a zumhnak funtomtu ca (manifesto) cu micheu sin ah email in a kuat hna, cun kha a zumhnak a fiantertu youtube video pakhat zong a chuah. Hi a kong a ttialmi le zeitindah lainawn ai timh ning a ttialmi pawl zapi sin a chuah ruangah a kong tlawmpal theih khawh a hun si. Tuandeuh mitampi ruah ning he lo loin, amah hi miphun daw taktak mi (nationalist) asi le muslim pawl a hua ngai mi EU chungah Muslim pawl nikhat hnu nikhat an karh chin lengmang mi kha  aduh bak lo mi, amah si khawh tawk in a ruahnak kong kha online website hna in a langhter ve tawnmi asi nak kha a lang. Atimi cu, “Tu cu biaruah caan a dih cang, mipum hrim in do a za cang” a ti.

Tulio cozah nih Muhammad cartoon Norway tadinca ah a chuahmi kongah lungthatlonak an langhtermi kongah a lung tlin lonak,   Palestinian hruaitu Yasser Arafat Daihnak Nobel laksawng an pekmi a lungtlin lonak tibantuk pawl a ttial hna. Cun ruahnak pakhat faktuk in a domi cu, EU le abikin Norway hna ah ram dangdang minung pawl kan ra hna i, kanmah tein duhpoh in kan covo (holh, ca, miphun hmelchunhnak) tibantuk pawl kan kilkawi mi le kilkawi kho ding in, mi buu in covo kan hmuh tukmi pawl cungah a lung a fak tukmi asi. Cun, Norway cozah nih kum 1999 ah NATO hmang in Kosovo ah, Albanian Muslim pawl thawl le dawi a duhmi hna Serbian krihfa pawl dohnak an rak tuahmi zong kha a rak duh lo ngaingai.  Pakhat chim rih ah cun hi pa hi nai hrawng theihbikmi terrorist pawl bantuk in Muslim lei minung siloin Krihfa lei asi i, ramdang, Muslim le minung covo kongah ruahnak vaangkauh te hna a duh lomi pakhat asi ti hmuh khawh asi.

Hmailei a cangding a ruahmi

A ca ttialmi “2083: A European Declaration of Independence” ah a ruahnak dang tampi lak ah ai timhtuahmi a langhtermi cu, kum 2083 tikah EU chung mah le mah i donak a dong te lai ati. Cu tik ah cun Muslim pawl le pathian hngallo pawl/ruahnak vangkau pawl an dih te lai- kan tei te hna lai tiah a ruat. Kum 2083 hi Philosopher Karl Marx a thih hnu kum 200 tlinnak asi tiah hlathlaitu pawl nih an chim, cu nih  a hei langhter ve duh lai mi cu, Karl Marx ruahnak a dongh kum a si lai a ti mi khi si dawh asi.

Thil na tuahmi tlamtling seh ti na duh ah cun, nangmah tein tuah”

Hi biafim hi a uar ngaingai, a ttial chihmi cu, “thil tampi kong ah, nangmah tein na tuah khawh, caan tu cu tlawmpal a rau deuh lai, nain a herh lomi thihnung thinphan awk um loin a donghnak ai timhtuahmi cu el/kham awk a ttha lo ” a ti.

A remlo ngaimi biafang pawl

Tolerance, social justice, economic justice, peace, reproductive rights, sex education and safe sex, safe schools, inclusion, diversity, and sensitivity.  http://www.americanthinker.com/2007/02/cultural_marxism.html

EU, abik in Norway ah thil fakpiin ai thleng lai?

Tutiang ah lainawng nih hi thil a tuahmi hi keimah lawng ka si ko a ti rih ko nain, mi tampi zumh ning ah midangdang an i tel kho men ti hi ruahmi asi. Minung dangdang hi bantuk taktak in tuah ding in timhtuahnak taktak a um lo hmanh ah, hi pa a rianttuan ning in a fiang ko cang mi cu, ramdang mi a huami, Muslim a huami, zapi covo, mipi I ruannak tibantuk biafang zalawnnak a tihmi an tampi rih ko lai ti a fiang.  Hi thil pakhat a chuah hnu in hi lainawng zong nih ai timhtuah ve ding a fiang ko mi cu, keimah bantuk a rak ruatmi hna nih ka keneh rak  zul te hna seh ti hi ai timhtuahmi asi ve lai. Mah caah cun, hi thil hi minung pakhat hnih do asi lo, ruahnak/zumhning (ideology) ral nganpi pakhat asi. A lung chung tein hi lainawng pa a thangtthatmi zong rak um hna seh law a hohmanh nih kan thei lo- an um lai tiah mi tampi nih ruahnak an ngei. Tu dirhmun ah cun, kan cozah le upa hna nih an au len ko mi cu, kan dirpimi cu kan thlah lai lo, zalawnnak kan tlik tak lai lo, kan democracy cu kan dirpi lai  tiin an au len. Upa mizei poh nih hi kong an chim tikah, an mitau khuacawl (kroppspråk) in a lang ngaimi cu, buu pakhatkhat sin ah chim hna seh law a lo tiah keimah cattialtu nih cun ka ruah. Chimduhmi cu hi thawngtla pa cung lawng ah an chim duhmi siloin tu bantuk in a rak ruatmi midangdang hna caah an chimmi khi a si.

Norway hi ram dai tuk pakhat asi caah kan palik pawl zong meithal hmanh an i ken lo. Hi thil cangmi hi Norway palik zeitindah kan thuamh hna lai timi biahalnak a chuak len cang. Cun kan thimmi hna upa hruaitu pawl hna zong security kan peek dan hna le tu thil cangmi kong ruah tikah thin phang asi cang. Hruaitu pawl security caah tamdeuh in caan le phaisa kan hman a hau lai ti ruahnak zong a um rih. PM zungpi hmai ah- tulio kan vawlei thil sining in- bom kg 500 hrawng asi lai tiah ruahmi an puah khawh hi, ram pakhat cozah kilveng tu security force pawl caah ningzak ngai thil zong asi fawn.

Thil a can hnu nikhat hnih hmanh ah mipi lung ai ruang, cozah party le a dang party hna zong lungkhat tein rian an ttuan ti hna, hmunkhat teah khua an ruat tti hna. Lung khat pum khat in an um mi nih, hmailei caan zeimawzat chung cu, fellowship kongah thahnemnak ah an i laak lai.Partliament debate zong caan zeimawzat chung cu a thlihran ai dang deuh lai ti ruahnak a um.

( Note: Caan karlak ah voikhat ttial ah ttialmi asi caah cafang palh a tam kho, ngaihthiamnak hal cia in. Careltu upat bu in ) 

A zumhning video a thlahmi

Hi he ai pehtlaimi dangdang

Oslo le a Pawng Tikulh Ah Bom a Puak, Meithal An i Kap

1 thought on “Norway Lainawng Pa Kong”

  1. Mah mithat pa tling te nan tial piak mi hna hi atha ngai. Muslim lawng hi zapi thah ahmang mi ralhrang an silo i Krifa thatha zong zapi thah hmangmi ralhrang an um ve tinak alanghnak zong asi. Hmailei ahcun Scandinavia ramkulh chung ummi mipeem ( immigrants) pawl caah fakpi in ralrin ahau, abu bu le cawlcanghnak ( CND tuah ) ti bantuk hi langsar tuk le cuangtuk tuah zong kan ni ralrin ahau te lai.

    Atu le bang Europe ah Neo-Nazi pawl an karh tuk cang i zapi ( mipeem ) dirhmun pawl nih kan umtu, kan cawlcangh dan hi an ram mi kan kemtuk sual maw tihi ralrin bik ahau. Mi ram ahcun anfimthiamnak tuhi laak i zuam hna usih law Chinland kir pi in ramser dih i tim cio ko hna hna usih.

    ” There is no place like home “

Comments are closed.

Scroll to Top