26 April ah Oslo Peace Center ah Burma kong Biaruahnak aum Lai

Burma Ralkap cozah nih tukum donghnak lei ah thimnak tuah ding in ceih asi cang. Thimnak tuahnak kong  ah hman ding phung (election laws) zong an chuah cang. Hi thimnak kong he pehtlai in hmuh ning pahnih in a um:

1. Election hi ttanpi/i telve ding a si, aruangcu, hi thimnak hi hmailei Burma ram tthanchonak caah kutka pakhat bantuk a si lai. Voikhat pi ah kan duhmi democracy bantuk a si khawh lo hmanh ah duhsah in hi ai ong cangmi lampi in ram kan remh khawh lai.

2.   Hi thimnak hi ttanpi awk asi lo, an tuah khawh lo nak ca hmanh ah a si khawh chung in khamkhen ding a si, aruangcu, telve/ttanpi ah cun, Ralkap nih tuahmi kha kan lung a tling tinak a si pin ah, kum saupi rak aupimi zalawnnak taktak kha a sung  kan peek bantuk asi lai.

Tulio thlihran

NLD nih thimnak ah kan i tel lai lo an ti, i register an tuah lo. NLD hi caan sau nawn, anmah chung ah hi kong ah debate a um , mitampi cu, nautatnak zong an ngeihmi pumpak an catial in a lang ngaingai. Thil sining taktak zoh loin Ralkap cozah huatnak rumro an khuaruahnak  ah  aummi hna nih cun, zeibantuk hmanh khi Ralkap nih an tuah zong ah a tha in a hmu kho lo mi an rak um ve. Cubantuk minung cu, NLD zong ah an rak um ve hrim. NLD cu 1990 ah mipi tamdeuh pi nih vo thlakmi party an si caah le western ram thawng pawl nih an ttanpi mi party a si caah (Nobel Pease laksawng hmu Aung San Suu Kyi thawng in), hi party nih kai tel lai lo tiah thawngthanhnak a tuah tik ah, midang party pawl buu pawl zong an dir hmun ah an i laklawh ngaingai cio [telve ding a si ko tiah ruahnak a ngeimi buu hna hmanh nih lungtlen siloin dirhmun thlen phun in a thlihran a kal mi hmuh khawh asi] Cucaah NLD hi an rak biapi tuk ti hi el awk  atha hrimhrim lo. Mitampi nih NLD kha biapi an si lo tiah a chimrelmi zong ai um nain, tuchun politic thlihran zoh ah cun a ling talet asi.

Burma ah cun political party pawl register an i tuah cuahmah ti thawng rel khawh asi. Annih nih an hmuh ve ning ah, tu bantuk ram pumpi thimnak ah kan i tel lo ah cun, hmailei ram kong ceihkhannak ah kan i tel kho ti lai lo, a leeng in au len nak in cun, a chung tu in thil remh ah a tha ko tiah a ruat vemi hna an si. An ruahmi /zumhmi bantuk tein an tuan ko ah cun, thimnak khawh hnu in duhsah in thil ai thlen kho ko tiah ruah khawh a si ve.

Achuak ding a fiangmi

Thimnak cu kan duh zong duh lo zong ah an tuah ko lai [ kan duh lomi lawng te nihin tiang ah an tuah peng ko hih]. Kan i tel zong ah tuah a si lai i kan i tel lo ah cun an i lawmh chin lai ti khawh asi. Aruangcu, anmah tei ding kha tamdeuh a fiang. Hi thimnak nih zeipipa thatnak achuah pi lai lo. Ai thlen ding cu, a cung phaw lawng a si lai, nichiar a chuakmi tadinca ah ralkap thuam pawl an langh a tlawm deuh lai. Tadinca le TV tibantuk hna ah caan tlawmpal cu, ruahnak phunhnih thum ai kalhmi tete hna hmuh awk an rak um te lai. [ Caan sau an nguh lai ti chim awk a haar, an celh te lai lo ti hi ruah cia khawh ngai a si]. Ramdang lei in chawletnak investment tamdeuh alut lai tiah chimmi a um nain, chim awk atha lo, aruangcu, thimnak ah kan i tel lai lo tiah a chimmi party pawl hna an um ve lengmang tik ah zeibantuk hmanh in election result va chuak seh law anmah ralkap lairelnak thiam a si ko lai ti kha inverstor pawl nih theih a si lai caah le a chuaklai ding cozah nih property right timi ramdangmi sipuazi tuahtu hna ding nih an  zoh bik dingmi a um hlei lai lo caah an tih ngai rih lai. Caan zeimaw zat cu an cuanh rih lai caah chikhat te ah zeihmanh hmuhawk tha ai thlengmi a um rih lai lo. Ka tial cang bantuk in a leng phaw lawng thlennak a um lai caah, a taktak ah mipi sin ah pum ruahnak zalawnnak taktak a um hlei lai lo i Aung San Suu Kyi nih a rak chim mi ” We are prisoner in our own country” atimi kanmah cu kanmah ram lila ah thawngtla kan si ko ati mi kha zeidang thlennak  aum hlan lo chung cu kan si rih ko lai ti ruahnak ka ngei.

Oslo Peace Center biaruahnak

Hlanlio Norway prime minsiter arak si mi Bondevik nih a rak thawkmi Oslo Peace Center cu, daihnak rianttuannak kong ah vawleicung theih in an cawlcang ve lengmang. UN le daihnak rianttuan buu dangdang hna he vawleicung daihnak rianttuannak kong ah an cawlcangh tti hna. Oslo peace center nih daihnak kong a cawlcanghnak ah hngal ngai a si mi cu, Burma daihnak le democracy kong ah a si, kumkhat ah voi tampi Burma kong ah ca chuahnak an ngei kho, UN le a dang buu hna he biaruahnak a um caan poh ah Burma kong telh chih lengmang asi.

Tutan zong ah an zung ah Burma kong ceihkhannak  ngei kho than ding in atanglei minung hna an sawm hna i ahopoh i tel kho ve ding in sawm kan si:

1. Aye Chan Naing ( Director of Democratic Voice of Burma )

2.  Nang Seng ( Burma Campaign UK)

3. Jared Genser (Aung San Suu Kyi lawyer)

4.  Gry Larsen ( Norwegian Ministry of Foreign Affair) zong sawm a si ve.

April 26, 2010 zaanlei nazi 2 ah an tuah lai i vai i tel ve khawh asi.

( Note:  Rangtuk deuh in ka tial i, cafang palhmi, catlang sentence chiah ning diklo tampi a um kho )

Scroll to Top