2016 CND & Norway Chin Football Championship kong thawngthanh

0 Comments

Norway khuakip um kan miphun khat vialte nan dam cio hna maw? Nan rianttuan, cacawn le cawlcangh khuasaknak cio ah nan tluang cio lai tiah ruahchannak kan ngei. Kum hlun adih i kum thar kan hun luh tikah thil thar tampi kan hun ton ve bantukin, kan tuah tawnmi tuah tthan ding thil tete zong an hun kan chuah hnawh tthan ve. Tutan zongah zapi nih kan theih awk a tlakmi le kan i tel cioding thil asimi kongah thawngthanhnak kan hun in tuah tthan hna.

Chin National Day 2016

CND cu kum tin tuah tawnmi asi bantukin 2016 zongah Norway hmun li ah CCN hruainak in tuah dingin kan ceih. Hmun 4 tuahnak le tawlreltu ah thimmi upa le hna cu a tanglei bantukin asi.

1. Nord Norge (Pu Sang Uk Cung Zinlawng)
2. Oslo Area (Pu Leng Dun)
3. Aust agder + Telemark (Vanlentine Thang – Valte)
4. Vest agder + Rogaland ( Sang Cung Lian + Peter Sang Lian Thang)

Acunglei CND tuahnak hmun cioah CCN nih atlangpiin i tel dih seh tiah duhmi cu;

1. 2016 Chin National Day cachuah (statement)
2. Norway ah Chinmi Fagbrev, Degree, Mintthatnak (rianah/cawlcanghnak pakhatkhat) a hmumi hna “Lunglawmhpinak Roca” peeknak.
3. CND background i khat kho cio seh (CCN nih suai liomi vakok cuangmi screen i hmang kho cio seh).

Mah le area cio ah CND timhtuahnak cu ttuanvo ngeitu kan pa le hna nih an tawlrel cuahmah lio asi. CND tuahnak theih ciami hmunhma lawng siloin a dangdang ah kanmah lungtho tein le local base buu cawlcanghnak in ai timhtuahmi kan um ahcun CCN upa hna sinah thawngthanhnak kan tuah kho ve ulaw, acunglei langhtermi i hrawm dingah kan duhmi pawl i hrawm khawh ve ahcun thil tha asi lai tiah kan ruah.

2016 Norway Chin Football Championship (NCFC)

Pumpalulh i celh hi minung kan i hawikomhnak le ngandamnak caah a herh lawng siloin team ah ai telmi miphun hna zeitlukin dah lung ai rual, hmunkhat ah an ttangtti kho timi a langhtertu zaangcelhnak zong asi. Norway zongah kan Chin miphun kan phanh hnuah cetlo tein a kan hruaitu upa le hna nih zaangcelh zuamnak a kan tawlrel piak lengmangnak kum 10 leng a kai cang.

Tukum zongah mino pawl nih celh zuamnak um dingin duhnak an ngeih lawng siloin Europe Chinmi kan i hawikomhnak 2016 CCEU conference zong nih a kan herh caah pumpalulh chuih celh zuamnak cu June 29 – July 2, 2016 tiang, Stavanger ah tuah dingin a tanglei bantukin timhtuah cuahmah asi.

November 21, 2015 ah mah kong he pehtlaiin tawlreltu hna le ttuanvo ngeitu hna meeting an thu cang. Budget zong 140, 000 kr (Tingkhat le thong sawmli) suai asi. Hi puai kongah zaanghlei a kan chuahpiaktu ttuanvo nganbik a kan laakpiaktu convener Nelson Lian Ling (Florence pa) cungah le upa dangdang cungah lunglawmhnak roca kan ttial. An meeting phichuak ceihkhanmi tete biapi deuhmi thawng kan in thanh chin ve hna lai.

NCFC ah telh ding in ceihmi items le tawlreltu hna;

1. Football – Nelson Lian Ling
2. Volleyball (nu & pa) – Nelson Lian Ling
3. Fashion & Talent show- San Mary Lian
5. Capar tial zuamnak – Saya Van Hei Lian
6. Group discussion – Ni Tha Bor
7. Hlasak zuamnak – Ral Siang Mang
Football team a chuak kho ding hna:

1. Hamer area
2. Elverum area
3. Oslo area
4. Stavanger area
5. Egesund area
6. Sandnes area
7. Agder area

Adangdang:

– Football zuamnak laksawng peek ding cawtu dingah ttuanvo peekmi cu, Chan Cung Hnin asi.

– Budget adih ding, 140, 000 kr chungin 40, 000 tiang (CCN nih chuahding) 30, 000 kr (Inntek Stavanger nih chuah ding), 60, 000 kr (celh zuamnak a chuakmi mah area cio nih chuah ding).
– Puai a rami mikhual pakhat nih registration fee 200 kr peek ding.

Biadonghnak:

Kan puai ningcang tein kan tuah khawh nak caah ttuanvo ngeitu upa vialte nih zaanghlei cawi lawng siloin mipi zong nih lungthin, thazaang, thlacampiaknak le kan ngeihchiah in kan ttan cio ahcun, kan miphun huap caah tthahnem santlai asi ko lai tiah ruahchannak le zumhnak ka ngei ko. Kan biakmi Pathian tu nih kan umpi seh law, hlawhtlinnak kan pe hram ko seh.
Upatnak he,
Sang Cung Lian Darchum
President, CCN

Peter Sang Lian Thang
Secretary, CCN

Categories: