2014 Chungah Norway Nih Mi 3000 Leng a Kherh Cang Hna

0 Comments

Photo: dagsavisen.no

2014 akal cangmi thla 6 chungah Norway nih ramchung umnak nawl a ngeilomi hna minung 3, 167 a kherh cang hna tiah thawng theih asi. Cucu buaktlakin nikhat ah minung 18 tluk kherh an si i, cucu nikum 2013 (nikhatah 13 tluk an kherh hna) he tahchun tikah nikhat ah minung 5 tamdeuh lengmang an kherh hna tinak asi.

Tukum chung tutiang kherh cangmi ah minung 1, 237 hi dantat khawhmi sualnak (criminal cases) ruangah chuahmi an si tiah theih asi. 2014 chungah tinhmi cu minung 7, 100 tluk kherh kho ding ti asi.

2013 chungah khan minung 5, 934 an kherh hna i, cu chungah 2, 224 hi dantat tlak sualnak a ngeimi an si tiah theih asi.

Buaktlakin minung pakhat an ram kherh nak ding caah a dihmi phaisa hi NOK 20000 asi tiah theih asi i, abikin Africa lei minung kherhnak caah cun a dihmi a tam khun i, NOK 100 000 tiang a dih kho tiah NRK nih a ttial. 2013 mikherhnak caah budget a dihmi hi kroner in million 680 asi tiah theih asi.

Tukum 2014 May thla tiang statistics zoh khawhmi chungin Burma minung kherhmi an um rih lo.

Ref: nrk.no, aftenbladet, politi.no

Categories: