2010 Nobel Daihnak Laksawng China Thawngtla Liu Xiaobo an Pek

Liu Xiaobo hi mitam pinih theihmi vawleicung minthang pakhat cu asi lo. Hi pa a rianttuannak kong zong poll an tuahmi cheukhat  zoh tik ah minung tampi nih theihmi cu arak si lo. Nain daihnak, zalawnnak le zaukphung uknak hna caah rian a ttuanmi hna nih cun an rak i zoh chun ngaimi le miraltha cathiam pakhat asi.

Tulio China communist cozah thawngpi kha raltha tein, kum saupi chung, an riantuanmi a diklomi le, zalawnnak an khapmi kong ah thangchiatnak vawleicung thei in a phuang zungzaltu asi. Zalawnnak a aupi tik ah pum thazaang tan laak i hramhram in siloin bialekaa tu in dai tein a rak dotu asi caah tu bantuk in daihnak laksawng an pek hi asi tiah laksawng pek thawngthanhnak an tuah ah chim asi.

Hi laksawng an pekmi kong ah ruahnak phunphun a chuak ve. China nih laksawng an pek hlan, laksawng hmu kho ding tiah zumhmi hna min cazin achuah i Liu Xiaobo min an hmuh caangka in, hi pa thawngtla mithalo vawleicung nih sunhlawihmi daihnak laksawng nan pek ah cun Norway le China karlak kan i pehtlainak hmanh a rawk kho tiah an rak chimh chung cang hna.

Tulio zong Norway TV, Radio debate an tuahmi ngaih tik ah micheu cu ram pahnih karlak ipehtlainak a rawk bak lai i fawi teah kan remh kho lai lo tiah an chim. Micheu ve baak nih cun, hi bantuk in Norway nih daihnak laksawng nih ai timhning tein kan peek khawh caah China mipi daihnak zalonnak a duhmi hna caah kan dirpi hna asi i, kanmah nitlaklei kan zumhmi le kan dirpimi zalonnak raltha tein kan dirpi asi tiah uanthlar ngai in  an chim ve.

Laksawng an pek ti thawngpang an theih in China cozah lei in ralrin peknak arak um cang ko buu ah, Norway Prime Minister Jens Stoltenberg nih “Congratulation” atuah colh. Cupinah rau lo teah USA president Obama le daihnak laksawng  a rak hmuve cangmi Tibet thlaraulei an pa Dalai Lama zong nih China cozah sin ah daihnak laksawng hmutu kha thawnginn chungin chuah ding in nawlnak a chim colh.

Khatlei ah China ummi Norway tanzung riantuan ambassador Svein O. Saether cu China ramdang lei zung nih biahal ding in an auh ve. Norway nih tubantuk in China nih ral bantuk ah hmuhmi kha daihnak laksawng an pekmi kong ah lungtlinlonak an rak chimh. China ramdanglei zung nih statement pakhat an chuahmi ah an tialmi cu  “ Nobel committee nih daihnak laksawng a dirhmunsunlawinak a buar ” an ti.

Liu Xiaobo kong tlawmpal

Hi pa hi 28 December 1955 ah Jilin province khuapibik Changchun khua China ram ah cathiam chungkhar in a chuakmi asi.  Nupi a ngei. Cozah nih zalonak kong an an riantuannak kong ah thangchiatnak a tuah lengmang mi asi caah avoi 4 nak thawng a tlak asi cang. December 2009 ah khan an tlaih i 2020 tiang tla ding asi, kum 11 tla ding in biakhiah asi cang.

Chapter 8 timi capaar a tialtu ah ai rak i tel i cu capar cu cathiamsang (intellectuals) le minung covo riantuantu (human right activists) 350 nih kan lung atling tinak ah minsen an rak thut. Cupinah minung 10, 000 leng nih online petition zong an min an rak tial chih ve. Chapter 8 nih biapibikin a halduhmi cu, China cozah pi nih mipi huapmi uknak lei ah thlennak, biaknak zalawnnak a um i phunghram remhthannak a umnak ding hna an si.  Mah hnu cun biatak deuh in mi nih rak theih asi.

Beijing Normal University ah Phd tiang a rak hmumi asi pin ah ramdang university cheukhat zong ah visiting scholar a rak tlawngmi asi. Norway Oslo university zong ah a rak phan bal.   Ca tampi a tial abikin daihnak minung zalonnak kong le zaukphung kong tibantuk hna an si.  A capaar cheukhat hna lak ah minih relngaimi lak ah pahnih cu “The internet is God’s present to China”,  “Authoritarianism in the Light of the Olympic Flame” tibantuk pawl an si.

Scroll to Top